كود سبور//
خاف الغابوني أكسيل مايي المهاجم ديال فريق اتحاد طنجة من الانتقال لفريق الهلال السوداني بسبب الوضع الأمني تما فالسودان، وبالتالي فالصفقة ديالو صبحت فطريقها للفشل.
الهلال السوداني من بعدما كان علن فوقت سابق على نجاح الصفقة، اليوم خرج على الصمت ديالو وكشف معطيات جديدة كتصدم الجمهور ديالو كيأكد من خلالها أن أكسيل مايي لاعب طنجة صبح صفقة شبه مستحيلة.
وتفاعل الهلال السوداني مع الجمهور ديالو لي كيسول مدة هاذي على المهاجم الغابوني، ونشر المعلومة فالصفحة ديالو ففيسبوك وقال: “على الرغم من ايفاء النادي لمتطلبات اللاعب المالية، ومحاولات التقني فلوران ابينيجي (المدرب السابق ديال نهضة بركان)، الغابوني اكسيل مايي ما زال متردداً في الانضمام لنادي الهلال السوداني بسبب ما وصفها ب”المخاوف الامنية””.
الهلال السوداني قال أيضا أن التردد ديال اكسيل مايي، وضع ادارة النادي فاختبار صعب للغاية مع استمرار المطالبات ديال الجمهور بحسم ملف المهاجم المحترف المذكور، وخصوصا أن الفريق فحاجة ملحة ليه للاعب فهاذ المركز الأمر لي غيخلي من الضرورة العمل على انتداب رأس حربة بمواصفات عالية قبل اغلاق سوق الانتقالات ولي غتسد فالسودان خلال 48 ساعة فقط.
للإشارة فالهلال السوداني علن قبل أيام فقط، على أنه حسم الصفقة ديال مهاجم إتحاد طنجة اكسيل مايي، لي كان كينافس عليه الوداد والرجاء، من بعد التدخل ديال المدرب ديالو الجديد فلوران نبينغي المدرب السابق لنهضة بركان لي حسب الهلال قدر يقنع اللاعب بالانضمام ليه، بينما كلفت الصفقة حسب ما قال الهلال فوقت سابق أكثر من مليون دولار.
