كود – عن أفريكا أنتلجنس//

قال موقع أفريكا أتنلجنس، أن المصالح القنصلية الفرنساوية ف المغرب رفضات تعطي الفيزا للعشرات من أطر المكتب الشريف للفوسفاط اللي كانو باغين يحضرو  معرض Vivatech فـ باريس، اللي غادي يتقام ما بين 15 و18 جوان الحالي. واعتبر الموقع ذاته، أن هاذ الشي داخل ف إطار “الأزمة الصامتة” اللي كاينة بين الرباط وباريس.

وسبق للمجموعة المشاركة ف فعاليات معرض “فيفاتيك” للتكنولوجيا الحديثة ف باريس ف نسختي 2019 و2021 اللي تنظمات عن بعد بسبب الجايحة وهاذ العام، من المنتظر باش غادي يشارك المكتب وجامعة محمد السادس متعددة الاختصاصات التقنية في النسخة اللي عادي تقام حضوريا.

وقررت فرنسا العام الفايت تخفيض عدد التأشيرات التي تمنحها للمغاربة إلى النصف، نفس الاجراء اتخذ بحق الدزاير وتونس، بسباب مشكل المهاجرين المغاربيين اللي عندهم اوامر طرد وترحيل وباقين عالقين ف فرنسا. واعتبرت الخارجية المغربية أن القرار “غير مبرر”، مؤكدة على لسان ناصر بوريطة أن المغرب كان ديما كيتعامل مع مسألة الهجرة وتنقل الأفراد بمنطق المسؤولية والتوازن اللازم.

وأوضح بوريطة أن لمغرب كان تعامل بشكل صارم مع الأشخاص الموجودين في وضعية ماشي قانونية، مؤكدا في نفس السياق أن المصالح القنصلية المغربية كانت قد قدمت 400 اعتماد مرور للأشخاص الموجودين في وضع غير قانوني.