الرئيسية > آراء > أغلب مدن الشمال من أنقى المدن في المغرب من غير العرايش حيت جات حدا القصر وعموما جبالة والأمازيغ سكان الجبال نقيين على خلاف سكان السهول الفلاحية الكبرى لي واخا لاباس عليهم والفلاحة عندهم مزيانة وفيها الدخل إلى أن مدنهم عبارة على أسواق أسبوعية كبرات وصافي
13/08/2022 17:00 آراء

أغلب مدن الشمال من أنقى المدن في المغرب من غير العرايش حيت جات حدا القصر وعموما جبالة والأمازيغ سكان الجبال نقيين على خلاف سكان السهول الفلاحية الكبرى لي واخا لاباس عليهم والفلاحة عندهم مزيانة وفيها الدخل إلى أن مدنهم عبارة على أسواق أسبوعية كبرات وصافي

أغلب مدن الشمال من أنقى المدن في المغرب من غير العرايش حيت جات حدا القصر وعموما جبالة والأمازيغ سكان الجبال نقيين على خلاف سكان السهول الفلاحية الكبرى لي واخا لاباس عليهم والفلاحة عندهم مزيانة وفيها الدخل إلى أن مدنهم عبارة على أسواق أسبوعية كبرات وصافي

محمد سقراط-كود///

أي واحد تسارى شوية في المغرب غادي يقدر يلاحظ بلي سكان الجبال أكثر نظافة وتاويل من سكان السهول، وأن النقى بصفة عامة كيبدى من تطوان ومنو كيتفرق على المغرب، بحال كيف كيقولوا أن الجوع تزاد في الشاون وتربى في تطوان، راه حتى نقى كذلك، أي سوق ديال جبالة غادي تلقى فيه رحبة كبيرة ديال الجير ومن الحاجات المهمة في التقدية من السوق هو الجير، والديور ديال جيالة ديما مجيرين بيضين كيشعلوا وديما نقيين، على خلاف مناطق خرى في السهول المغربية الممتدة كتلقى الدار ووسطها زريبة وبنادم مخلط مع الغنم مع الغيس والتراب مع الزبل، والجبليات لي كيبيعو المنتوجات الفلاحية ديالهم في مدن الشمال ديما تلقاها لابسة البيض والمنديل والفوطة بيضة ناصعة فوق كتافها، بينما في الغرب ولا الشاوية ولا دكالة راه القيادة ومكتلقاهاش بيضة، علما أن جبالة فقراء جدا مقارنة بسكان السهول الفلاحية لي الحركة عندهم رايجة وعندهم الفلاحة الكبار لي لاباس عليهم ديال بصح ملايرية، حتى الكيف بالنسبة للفلاح راه غير قاضي بيه الغاراض وصافي والى لحق بيه شي دار في بيرشيفا مايقولها لحد، حيت الأرض أصلا صغيرة وزادت تفرقات مع مرور الزمن ولات عبارة على قطع صغيرة متنازع عليها كيطيحو عليها الرواح ديما، غادي تجيب أكبر فلاح ديال الكيف مايوصلش لفلوس فلاح من الغنادرة ولا سيدي بنور بلا منهدرو على هوارة ونواحي أكادير عموما، ولكن ديما غادي تلقى الفيلاجات والمدن الصغرى ديال هاد المناطق عامرة زبل ومكرفصة وعبارة على سوق أسبوعي كبر وازاد فيه البني وصافي، بينما الفيلاجات ديال الشلوح لي في الجبال وحتى جبالة كتلقاهم نقيين والدنيا مشطبة والناس نظاف وكيهدرو بشوية وغير بيناتهم.

حتى بن خلدون قال عليهم بحال هادشي وبين الفروقات بين سكان الجبال وسكان السهول، وقال بلي صحاب الوطى يكثر فيهم الطرب والهرج والمرج والنشاط وأسواقهم مكتخوى حتى لعشية ومكيخزنو والو في ديورهم، على عكس سكان الجبال سواقهم تعمر بكري تخوى بكري ناس طرانكيل قاصحين وديما عندهم خوابي ومطمورات مخبيين فيهم المونة لدواير الزمان، المشكل لي كيوقع في الصيف حاليا هو تصادم هاد جوج ديال الأجناس والأعراق والأنماط الثقافية المختلفة وطبعا كتشمخ بالعنصرية والسبان وشلا مشاكل كيتشكاو منها الناس، ناس الشمال كيبغيو المدن ديالهم وعندهم غيرة عليها والصراحة مدنهم من أجمل مدن المغرب، مثلا مشهد ديال مواطن غادي في الطريق ويلقى قرعة مليوحة في ويهزها من الأرض ويحطها في بلاصة الزبل راه مايمكن تشوفوا إلا في الشمال ، أولا لأن الناس أصلا نقيين تانيا كاين البنية التحيتة والتجهيزاتـ، مثلا في فاس الى بغيتي تدير هاد الجيست خاصك تهز القرعة وتطلع حتى لإفران باش تلوحها حيت في فاس ماغاديش تلقى فين إلا تلوحها في الطريق نيت فين كانت، شوفو غير احترام الراجلين كاين غير في الشمال، حتى أرقى المدن بحال الرباط راه متافيها لا احترام الراجلين لا والو، نتا فوق ممر الراجلين وتاواحد مكيوقف نهائيا.

دابا بنادم كيكون في مدن هي عبارة على أسواق أسبوعية كبرات أو دواور كبرو، وحتى المدن العتيقة راه بقوة التهميش والهجرة القروية كاع مابقيتي تشوف مظاهر التمدن فيهم، مكناس.. فاس .. سلا .. آسفي، هادو مدن عتيقة عندها تقاليد وحضارة وتاريخ ولكن حالها دابا يشفي لعدا، ومظاهر التمدن منعدمة فيها تحولات من مدن عتيقة لدواور في الخلا، فاس المدينة القديمة ديالها كلها زبل ودوك السقايات التاريخية وكتلقاهم عامرين زبل، هاد الناس لي حولوا مدنهم لزبالات كبار راه فاش كيمشيو لمدن أخرى وكيتصرفوا بالمثل عادي جدا أن الناس يتعاملوا معاهم بتحفظ أكثر وينتاقدوا السلوكات ديالهم، وراه هادشي لي كيوقع في الصراحة، كيكونوا بحورة نقيين وزوينين والا في الأحلام غير كيهجموا عليهم الدوتراكي كيوليو عبارة على زبالات كبار، شاطئ تشارانا كمثال راه تحول لزبالة في الوقت لي كان واحد من أجل شواطئ المتوسط، وعموما كاع المنتزهات والشواطئ المغربية تحولات لمزابل من غير شواطئ الشمال طبعا حيت كاين جماعات ومواطنين كيسهرو على تنظيفها ولكن للأسف حتى لين يقدرو يقاوموات الزحف.

موضوعات أخرى

29/03/2024 13:17

ها المعقول..استثمار صيني كبير فالمغرب بـ3 مليار درهم لانتاج بطاريات السيارات الكهربائية غايوفر 2500 منصب شغل وبلادنا هربات على لالجيري فصناعة السيارات

29/03/2024 13:00

الجيش الإسباني غاد يوسع المنشأت العسكرية ف سبتة ومليلية وغيجهز مراكز خاصة للتدريبات والمناورات لسلاح المدرعات

29/03/2024 12:50

تفاصيل حصرية على وضع منسقة جهوية لحزب سياسي بجهة فاس مكناس فالحراسة النظرية: خدات من الضحايا فلوس صحيحة وصلات 18 مليون والمدير الجهوي ديال الضرائب هو اللي فضحها

29/03/2024 12:25

خاص.. وضع المنسقة الجهوية لحزب سياسي بجهة فاس مكناس فالحراسة النظرية بسبب قضية كبيرة ديال النصب والاحتيال والتزوير

29/03/2024 12:00

السلطات المغربية قبلات العودة ديالهم.. گاع الحراگة اللي استغلو الموڤيطا ديال الثلاثاء الفايت وحرگو لسبتة رجعو تا اللي بالغين ودارو راسهم قاصرين

29/03/2024 11:30

الدريب لـ گود: الناصيري عطى لكثير للوداد وهادي صفحة وطويناها ودابا حقبة جديدة برئاسة البرناكي وغنخدمو لإرضاء الوداديين

29/03/2024 11:00

البوليساريو بغات تستاغل الرئيس السنگالي الجديد وكتزاوگ فيه يدير معاها علاقات

29/03/2024 10:40

جدل امتحان البيرمي.. “نارسا”: كاين تطور إيجابي فنسبة نجاح المترشحين فاليوم الرابع ووصلات لـ54,41 فالمية