واش الحكومة غاتحل الحمامات مور الشتا لي طاحت.. بايتاس لـ”گود”: على حسب كل إقليم والوضعية ديال الماء فبلادنا صعيبة ونسبة الماء لي دخلات للسدود ضعيفة
محمد سقراط – كود///
كاين واحد الوثائقي أمريكي سميتو” في إنتظار سوبرمان”، كيدوي على فضل النظام التعليمي في ميريكان من بعد ماكان من بين الأفضل فالعالم، حاليا خرات عليه وأصبح كينتج مواطنين بلا مهارات وباين من اللول عمرهم ماغادي يوصلو شي حاجة غير حيت تسجلو فمدارس ديال الدولة فمناطق معينة، وفهاد الوثائقي هدرو شي مدراء وخبراء ديال التربية والتعليم، وقالو بلي أن أي خطة للإصلاح حاولو يديروها إلى وكانت كتلقى معارضة شديدة من نقابة المعلمين، حيت لقاو بلي من غير البرامج التعلمية وطرق التلقين فراه المعلم والأستاذ لي مرسم فخدمتو ولي صعيب أنك تطردو كيتحمل جزء كبير من هاد الفشل ديال المنظومة التربوية، ولقاو بلي حتى هوما عندهم بزاف ديال الأستاذة لي غير كيجيو يأكدو الحضور ويمشيو بحالهم وصاليرهم طالع، من بعد جربو يديرو التعاقد فشي مدارس ودارو فيها مقررات جداد ونجحات بزاف، لأن المعلم فيها كان خاصو يكون قمة الكفائة باش يقدر يضمن بلاصتو وكتم مراقبتهم بصرامة، وهادشي عطا نتيجة طبعا حسب الوثائقي، وبين بلي أن الأستاذ المرسم الغير مهدد في مورد رزقه سواء قرا أو مقراش راه كيتحمل جزء كبير من فشل المنظومة اتعليمية.
أغلبنا سمع واحد النهار من عند الأستاذ أو المعلم ديك الجملة ديال قرى أو لهلا يقريك أنا خلصتي واصلة فأخر الشهر، هادي ماشي مبالغة أو زيادات فيه ولكن ضروري أي واحد داز من التعليم العمومي إلا وسمعها شي نهار، طبعا ماشي كولشي ولكن راه نسبة مهمة هذا هو الهدف ديالها أصلا فالخدمة هو تخشيه فالدولة، وبالنسبة ليا راه الأساتذة المتعاقدين من هاد النوع، حيت منطقيا مايمكنش تكون سنيتي بكامل قواك العقلية على كونطرا وفاللخر تسمي راسك الأستاذ لي تفرض عليه التعاقد، منطقيا ماجاياش كاع، وتسوق راسك كضحية لشي حاجة منعرف شناهي.
الإنفاق العمومي كيتقل ميزانية الدولة والتعاقد هو الحل الحقيقي والواقعي، غير هو هاد التعاقد ماخاصش يكون غير تهرب من من زيادة الإنفاق، خاص تكون مآمنة بيه الدولة على أنه جزء من الحل للنهوض بقطاع التعليم، وعلاش لا يتعمم حتى فالقطاعات الأخرى لي كالسين فيها العديد كيمصو الدم ديال الدولة بدون أي إنتاجية تذكر، علاش لا ماتعممش تجربة التعاقد حتى على القطاعات الأخرى من غير التعليم، ونشوفو إن شاء الله دولة متعاقدة مع كولشي ولي مادارش خدمتو يروح يقلب على بلاصة خرى.