كود- عن لوباريزيان//

كشفات صحيفة “لو باريزيان”، أن استاذ ديال الماط فليسي بروفيسيونيل كلوب دونو  فمدينة فنانسي حبسوه على الخدمة وتابعوه، من بعد ما حط تدوينة ففايسبوك كدافع على طالبان، من بعد استيلاءهم على السلطة فأفغانستان.

وقال الأستاذ (خالد.ب) أن طالبان، بعدما اقتحمات أفغانستان نهار 16 غشت اللي فات، كانت بينات على شجاعة “غير محدودة”، هذشي اللي خلى أكاديمية نانسي ميتز تتبرى من هذ التصريحات، وتوقفو على الخدمة، كإجراء احترازي،

وذكر المدعي العام فرانسوا بيرين أنه تم الإبلاغ على العديد من الأشخاص المجهولين اللي عطاو “ملاحظات مشابهة حول طالبان” فنفس الوقت.

وقال المدعي العام أن طالبان كاينة فليست المنظمات الإرهابية التابعة للاتحاد الأوروبي، الشي لي كيبرر التحقيق اللي دار على الأستاذ، وهذشي غيدعم التوجه الجنائي ديال المتابعة.

والأستاذ كشف مرات كثيرة على ارتباطو بالإسلام السياسي، من خلال تدوينات وكتابات، وكان خدم سنوات فالمدرسة الكاثوليكية الخاصة Notre-Dame-de-Peltre فميتز بلا مايشكل سلوكو حتى مشكل أو يبين على شي إيديولوجية متطرفة.

https://www.leparisien.fr/faits-divers/de-courageux-talibans-un-enseignant-de-nancy-suspendu-et-poursuivi-pour-apologie-du-terrorisme-03-09-2021-2SHOBMD75NFPRFMDXS37RMAU6Y.php