عفراء علوي محمدي- كود//

اليوم الاثنين تأكدات إصابة أزيد من 120 شخص بفيروس كورونا المستجد فشركة دالحوايج فحي الرحمة الصناعي فسلا.

وحسب معطيات توصلات بيها “كود”، فالسلطات تكلفات بإغلاق لوزين اللي كيضم 600 من العمال باش مايزيدش ينتشر فيه الوباء كثر ويتقاس بالتالي الحي كامل.

والمندوبية الإقليمية للصحة شرعات فتحديد قائمة المخالطين ديال المصابين باش تحصر رقعة انتشار الفيروس فصفوف عائلاتهم وأقرباءهم.

وهذ الحصيلة مازال مرشحة للارتفاع، بحكم أن مجموعة من العمال مازال ماخرجو ليهم النتائج دالتيست اللي دارو.

وهذ البؤرة كتنضاف لبؤر كثيرة تسجلات فالأيام الأخير فالمدينة، وكيتعلق الأمر ببؤرة عمل الخياطة فسلا الجديدة، بالإضافة لمجموعة من البؤر الأسرية والمهنية الأخرى.

واليوم تسجلات 126 إصابة جديدة بفيروس كورونا المستجد فسلا، من أصل 268 إصابة تسجلات فجهة الرباط سلا القنيطرة كاملة.