محمد سقراط-كود///

كنظن أزمة كورونا فرصة كبيرة للمغاربة فين يسترجعوا بلادهم ويوليو مواطنين من الدرجة الأولى فيها، حيت لا يعقل أنه يبقى المغربي يكمي أو يتاجر فالزطلة المغربية ويمشي للحبس بينما هولندي مثلا يمكن ليه يستهلك الحشيش المغربي بالقانون واخا راه منتوج مستورد وجاي بطرق غير شرعية، ومايمكنش أيضا أنه أي أجنبي من حقو يشرب بيرة فلاطيراس فأي بلاصة في المغرب ومن حقو يضرب الطاسة فرمضان ويشريها من لاكاف بينما المغاربة ولاد لبلاد خاصهم يدخلو يتخباو فبيران بلا شراجم، ويشريو الطاسة في وقت محدد ومن أماكن محددة ويكونوا مهددين أن المخزن يوقف عليهم ويدي ليهم الميكات ديال الشراب بينما أجنبي مكاينش لي يهدر معاه، ولا يعقل أيضا أن مغربي يبغي يشد أوطيل هو وصاحبتو خاصو كاغيط ديال الصداق والعرس ويعرض العائلة ويكري القاعة والطريطور، هادشي كلو على خمسة دقايق.

هذا راه نوع من الإظطهاد كيعانيوه المغاربة يوميا وصابرين عليه، راه مكاينة فحتى شي بلاد متحضرة أن الأجنبي يكونوا عندو إمتيازات في الحياة كثر من مواطني البلاد ، لوطيلات أحسن العروض وأرخصهم موجهين للاجانب بينما ولاد لبلاد مكاين غير ضرب بنادم حتى يشعل الضو، دابا كيف يعقل أن مواطن مغربي إلى بغا يشرب بيرة في رمضان من ورا الفطور طبعا خاص يشريها من عند مونامي، أو يكون يعرف شي حد من المهاجرين الأفارقة هو يتقدى ليه، ولي يقدر يكون حتى هو مسلم ولكن غير حيت أجنبي ياخد راحتو هانية، الزكاير غير مع ولاد لبلاد.

عجيب بزاف هاد الإزدواجية فالتعامل ديال الدولة مع المغاربة مقارنة بالأجانب، وطبعا هادشي خاص توضع ليه نهاية، حاليا الحدود مسدودة وواخا تحل غادي يكون باقي الخوف عند الناس من أنهم يسافرو ومايتبع الأمر من مخاطر، يعني المغرب دابا ديال المغاربة والى غادي يتروج السوق فراه غادي يتحرك غير مع ولاد لبلاد، إذا الدولة خاصها تكون بعقلها وتطلق الناس يستهلكو بحرية شنو مابغاو بلا قيود ديال القرون الوسطى مابقات صالحة لوالو من غير الإبتزاز لا غير، تقنن زرع وإستهلاك الحشيش المغربي المعروف بالجودة، ويتخلي المغاربة لي بغا يشرب يشرب ولي بغا يمارس الحب يمارسو وتوفرليه فين مادام قادر يخلص فماخاص حتى شي قانون يمنعو، راه هادي هي الطريقة الوحيدة باش بصح تروج القضية شوية راه بزاف ديال المغاربة لي كيسافرو سياحة برا راه كيمشيو غير على ود الحرية ماشي على ود البحر راه هنا.