كود الرباط//

أزمة جديدة داخل الأغلبية الحكومية، هاد المرة خرجات بشكل رسمي وبانت من خلال الخرجة الاعلامية لي دار إدريس لشكر، الكاتب الأول لحزب الاتحاد الاشتراكي، لبارح ف دوزيم، ولي عبر بطريقة “مثيرة” على مطلب إخراج حزب التقدم والاشتراكية من الحكومة.

لشكر هاجم نبيل بنعبد الله ووصفو بـ”التلميذ النجيب لبنكيران”، وانتقد ما وصفه بتسريب بنعبد الله لنقاشات لقاءات الأغلبية، هادشي داير القلق للتحالف الدائر بين “البيجيدي” و”البي بي اس”.

حسب مصادر “كود” فإن لشكر زعم بزاف على رئيس حكومة، حيث لقاه “ضعيف” ومعندوش “ديك القوة” باش يحبس لشكر ويفرانيه ويعطيه مكانتو.

لشكر قال لبارح في برنامج “حديث مع الصحافة” بأنه “هو القطب الرئيسي في الحكومة”، وبلي وزرائه كفاءة وعندهم حصيلة مزيانة، رغم أن لشكر مشاداش لا قطاعات اجتماعية ولا اقتصادية.

هادشي داير استنفار وسط أمانة البيجيدي، لي بعض أعضاءو مكرهوش يخرجو اتحاد لشكر من الحكومة، ولكن “كيشوفو بلي الامين العام ديالهم ضعيف لدرجة ميقدرش يدور ف لشكر واخا هاد الأخير استفز تحالفاتو”.

بالنسبة لمصدر قيادي في أحزاب “الأغلبية”، فإن “ضعف العثماني وزعامة لشكر شوهات مضامين التعديل الحكومي”، مضيفا :”حنا بغينا حكومة تخدم ماشي حكومة تصفي حسابات ولي تزيد ضعف الأحزاب وهادشي شفتو كيفاش أثر على الثقة ديال المغاربة ف المؤسسات”.

وتابع ذات المصدر الذي فضل عدم ذكر اسمه بالقول :”واش لشكر هو لي غادي يورينا شنو خاص التعديل الحكومي”، مضيفا :”دبا كاينين توجيهات الملك ورئيس الحكومة خدام عليها”.

وتساءل ذات المصدر “:” كيف لحزب عندو غير شي 20 عضو برلماني ف مجلس النواب، كيدير هادشي كامل فوسط الحكومة”.