نهضة بركان غيمشيو من مطار الجزائر للوطيل يرتاحو والكاف عطاهم ضمانات على التونيات
كود – وكالات//
الأرشيف ديال الممثل المصري الراحل نور الشريف داير الروينة، بعدما لقاوه كيتباع في السوق ديال الأنتيكات وسط العاصمة القاهرة.
الناقد السينمائي عصام زكريا هو لي فجر القضية، وقال أنه لقا بالصدفة كتوبة ديال نور الشريف كيتباعو في السوق وسيديات ديالو وتصاور خاصين فيهم توقيع بالخط ديالو.
هاد الأرشيف كان في الدار القديمة لي كان كاري نور الشريف وسط القاهرة، ومول الدار بلا ما يعرف القيمة ديال داكشي خرجو لصحاب الأنتيكات على أساس أنه خردة بغا يتخلص منها.
دابة الأسرة ديال نور الشريف بغات دير دعوى قضائية باش ترجع الممتلكات الرمزية ديالها لي معروضة في السوق، على أساس أنها كانت ضائعة ليهم.
وكانت الأسرة ديال نور الشريف عطات لمكتبة الاسكندرية جزء من الأرشيف ديالو، بحال تصاور عرسو مع بوسي وشي كتب ومخطوطات وندوات مسجلة في سيديات باش تبقى تعرضهم المكتبة.
هادشي خلا المكتبة تخرج وتوضح أن الهدايا لي قدمات ليها أسرة نور الشريف من بعد الموت ديالو مازال عندها وعارضاهم في الأروقة ديالها، وما عندها علاقة بداكشي لي كيتباع في السوق.