كود بنسليمان //

مازالت الأخصائية النفسانية صوفيا المقدمي، مضربة عن الطعام والماء، في سجن بنسليمان، ضد ما أسمته ب”الحكَرة والظلم”، خصوصا أنها كانت كتعتاقد أن تبليغها عن جرائم الاعتداء على أطفال ب”دار للرعاية” بالمدينة، هو من باب المواطنة والقضاء على العنف على الأطفال بكل أشكاله، لكنها بالعكس حوربت بقانون محاربة العنف ضد النساء، وطبقو عليها الفصل 447 ديال التشهير، رغم أنها ماشي هي الناشر تاع الشكايات ديالها بل الإعلام هو من قام بذلك، وحكمو عليها بعام ونص ظيال الحبس رغم أنه كاين دري صغير قال للقاضي كلشي وشرح ليه كيفاش كان تيتعلق وياكل الزرواطة بالعصا ديال الكراطة وسط “دار الرعاية” اللي هي أصل هاد المشكل.

أول البارح هزو صوفيا من الحبس للصبيطار حيث الإدارة ديال السجن متبعا حالتها مع الإضراب على الماكلة اللي بداتو، وتبين أنها كانت في حالة حرجة تستدعي نقلها للمستشفى وبقات 5 دالسوايع تحت العناية.

النيابة العامة اللي كانت رسلات ممثل ليها السيمانة الفايتة يبدو أنها مامسوقاش، رغم أن المطالب ديال السجينة منطقية، وتتشبت ببراءتها، حيث ماطلباتش شي حاجة ضد القانون، غير الأقوال اللي صرح ليها الطفل قدام القاضي وشرح فيها التعذيب اللي تعرض ليه كانت كافية باش يتفتح بحث، خصوصا أن المغرب موقع اتفاقيات ضد تعذيب وتعنيف الأطفال.

دابا علاش عاقبو اللي فضحات هادشي رغم أن القانون تيحمي المشتكين؟، واش باش حتى واحد مايبقا يتحرأ يفضح الجرائم؟، ولا باش يغطيو على بعض اللي خدامين فديك “دار الرعاية” و الاعتداءات اللي كتوقع وسطها ف حق الأطفال وباش مايوصلش كل هادشي للأميرة اللي تترعى نفس الدار؟

صوفيا اللي شاركات في مجموعة ديال اللقاءات الرسمية للتوعية من الاعتداءات الجنسية على الأطفال ومحاربة الإدمان، وساهمات بشكل كبير في مجموعة من الورشات بشكل تطوعي، تتخلص اليوم، بوحدها، حيت عزلوها والغالبية ضربو الطم وحاكموها بالزربة، لكنها عنيدة وتقدر تدير أي حاجة من أجل إنصافها، حسب بعض المقربين منها.

الوالدة تاعها اللي جات من تونس، حيث صوفيا عندها دوبل ناسيوناليتي، مغربية وتونسية، تتبكي وتتطلب الناس يتدخلو باش صوفيا توقف الإضراب، حيث عارفاها عنيدة وتقدر تمشي بعيد في الإضراب.

اليوم 25 نونبر اليوم الدولي لمحاربة العنف ضد النساء، لكن يبدو أن العنف ماكيجيش فقط من الأزواج أو الرجال كأفراد بل أيضا حتى من بعض المؤسسات اللي ماكتعطيش الحق للمرأة، ودابا القضاء اللي هو صمام الأمان، “سد وذنيه على صرخات طفل قدامو اللي فضح التعذيب اللي عانى منو، وناض وحكم على الأخصائية النفسية ظلما، حيث واخا الحكم غير ابتدائي، لكن راه سلب الحرية صعيب سيرتو بالنسبة لإنسانة مظلومة عوض الوقوف إلى جانبها و التحقق من شكاياتها، تم الحكم ضدها وإرسالها للسجن”، يضيف مقربون من صوفيا.