سهام البارودي – كود//

آ الله على راحة ! وزيرات الحكومة الجديدة تاوحدة فيهم مادايرة الحجاب و مغنبرة وسط الزيوف ! آ الله على راحة كانشمو شوية ريحة الحداثة و ريحة المغرب ما قبل الهجوم الوهابي ! آ الله على راحة كانشوف وزيرات كايشبهو ليا و لخواتاتي و صحاباتي ! وزيرات نبغي بنتي تاخدهم قدوة و فاش تشوفهم فالتلفزة تتمنى تكون فحالهم !

حيت انا شخصيا كانشوف بلي الحجاب ماشي غير لباس عادي و صافي !لا الحجاب راه ايديولوجية ! الحجاب راه هوا الرمز ديال الاسلام السياسي! الحجاب رمز من رموز العنصرية و الاقصاء ضد المرأة و النظرة الدونية للجسد ديالها على اساس انه “فتنة” و “عورة” فا اذن مايمكن غير نفرح فاش نشوف بأنه الوزيرات لي كايمثلو صورة المغرب يكونو كلهم بلا حجاب !

ولكن كانتمنى انه الحداثة ماتكونش غير فالزي و نشوف الحداثة حتى فالقوانين و المبادرات لي يمكن انها تساعد المغاربة عامة انهم يبعدو من مستنقع الجهل و التخلف و المرأة خاصة ! خصوصا فوزارة الاسرة و التضامن لي من المهام ديالها انها تنهض بالمستوى ديال العيالات فالمغرب ! كانتمنى أنه هاد البوكي ديال النساء لي فوزارات مهمة فحال المالية و الاسرة و الصحة و الوزارات الاخرى يكون عندهم دور فتحرير العيالات المغربيات من براثين الفقر و الأمية !

و لي ماعندو سيدو ! عندو لالاه!