24/04/2024 23:00
هادي خبار زينة.. أسماء المدير مخرجة “كذب أبيض” فلجنة تحكيم مهرجان كان العالمي
الوالي الزاز -كود- العيون ////
سؤال ديما كيتطرح فهاد الوقت من السنة. ديما ناس العيون كتقلب على إجابة عليه ولكن والو ما لقاتهاش. وواخا تزيد قرن للقدام ما غاديش تلقاه.
علاش ديما خصنا الهرج والمرج فالإحتفالية ديال عيد المسيرة فالعيون؟ علاش ديما خاصنا نجيبو مارادونا وصافيولا وكريسبو وزيد وزيد ونخسرو عليهم فلوس باش يجيو يلعبو ماتش فالعيون ويمشيو فحالهم.
كاينين شي وحدين واضحين فتصورهم كيقولو بأن الغرض من حضورهم للعيون سياسي محض ويكفي أن واحد من هاد اللاعبين يدير بوسط فأنستغرام ولافيسبوك ولا تويتر فيه العلم المغربي فالصحرا. ويروج لمغربية الصحرا.
ولكن واش هادي فعلا استراتيجية ناجعة باش نروجو لتصور سياسي وباش نقولو للعالم بأن الصحراء مغربية ؟ راه الترويج السياسي كيكون بزيارات رسمية وعلاقات وتدخلات على أعلى مستوى. راه ماشي ريفالدو لي غادي يجيب لينا قرار مزيان فمجلس الأمن. وماشي روجي ميلا لي غادي يدوي لينا مع ميريكان باش نشوفو صيغة مزيانة للقرارات. وماشي نادر السيد حارس مصر لي كيكون مع كَوتيريس فاش كيوجد تقريرو. وماشي الحاجي ضيوف لي غادي يدافع علينا ضد الهجمة الجنوب إفريقية الجزائرية المنسقة.
هادشي ما شادش وخاص إعادة نظر فهاد المباريات لي كتكون بلافائدة على العيون ولا الصحرا. خاص نفكرو بعقلنا بعيد على لغة الخشب ونكونو واقعيين فدفاعنا عن الوحدة الترابية. راه بنادم كيروج لأطروحة سياسية ربعين سنة هادي بزيرو دولار واستقبل مبعوثين أممين سابقين بحال كريستوفر روس كاع بزيرو دينار جزائري.
راه ما يمكنش يا عباد الله خسران لفلوس بهاد الطريقة التبذيرية على ماتش كرة قدم ما عندو مايضيف لينا وما عندو ما يضيف لناس العيون. خليونا من هاد العبث وفلوس الماتش والدعوات الخاصة. استثمروا هاد لفلوس فالإنسان وفساكنة المنطقة وبنيتها التحتية باراكة من هاد الشاو الخاوي لي ماعندو فائدة. راه حتى الما كتجيبوه معاكم من الرباط وكازا ومراكش وما عند هاد الحدث ما يضيف للمنطقة ولا ساكنتها. كلشي جايبنو من برا وتا مول الحانوت ما مستافد معاكوم فهاد الحدث فقرعة ديال الما.
ساكنة المنطقة ما عندها مادير بلاعبين اعتازلو وملو يشوفوهم عندهم كل عام فجو ديال الولائم وموائد الجاهلية بحال الى هوما لي جابو الصحرا. الناس بغات تشوف اقلاع إقتصادي بغات تشوف لعيون بحال كازا ومراكش. بغات ولادها يخدمو. بغات تشوف سبيطارات فالمستوى. ما عندها ما دير بماتش خاوي ما وراه نفع.
ومسألة أخرى خليونا من هاد بنادم لي فين ما كتكون شي كَاميلة تجيبوه لينا لهاد لبلاد وتعطوه الصلاحيات يطير وينزل على أساس هو لي فهاد لبلاد لي وطني وهو لي كيموت على الدرابو. هادشي راه تميع بزاف وأصبح بلا معنى. فكرو بعقلكم وخليونا من خسارة لفلوس بلا فائدة وحتى إذا شاطو وبغيتو تخسروهم عرفو فين تحطوهم ونحققو من وراهم شي حاجة لي تنفعنا وتنفع لبلاد والمواطن.
