كريم الصوفي – كود //
علمت “كَود”، أن غرفة الجنايات الابتدائية بمحكمة الاستئناف بمدينة آسفي حكمات الخميس الفايت على الخدامة المتهمة بتسميم سويسرية ورجلها بسباب الانتخابات بـ 20 عام ديال الحبس بعد مؤخذاتها من أجل “جناية محاولة القتل العمد مع سبق الإصرار و الترصد طبقا للفصل 393 و 114 ق ج”، فيما أدانت باقي المتهمين الثلاثة الاخرين بـ 3 سنوات نافذة بعد مؤخذاتهم من أجل “إعطاء شخص مواد تضر بالصحة دون نية قتله”.
وتعود تفاصيل الواقعة إلى الشكاية اللي تقدمات بيها مواطنة سويسرية من أصل مغربي وراجلها إلى الوكيل العام بمحكمة الاستئناف بمدينة آسفي حول تعرضهما للتسميم من طرف خادمة منزلية ومتهمين أخرين. وكشفت الخبرة الطبية اللي أمر بها قاضي التحقيق وتكلف بها المختبر الوطني للدرك الملكيدفوعات المشتكين خاصة بعد ما بدات كتبان عليهم أعراض الفشل الكلوي.
وعرفت القضية متابعة خادمة منزلية وموظفين جماعيين وعطار وشخص آخر ، بمن فيهم مسؤول جماعي. هاذ الشي كامل بسباب اعمالها الخيرية وتزايد شعبية السويسرية وراجلها عند ساكنة الجماعة والتخوف من نزولها للانتخابات مستقبلا وفوزها بها بسهولة حسب اعترافات متهمين.
وتفرشات القضية بعد شكوك السويسرية وراجلها في الأعراض المرضية اللي جاتهم بجوج. شكو في الخدامة اللي كتطيب ليهم. دارو راسهم مسافرين وزرعو ليها في التيلفون شي پـيس كتسجل كلشي، وبالفعل لقاو السيدة كتنسق مع مجهولين وكتاخذ من عندهم خلطة تديرها في الماكلة. وبعد مواجهتها اعترفت بكلشي قدام الجدارمية وتشد العطار والموظف الجماعي وشخص آخر، اللي كانو كيعاونوها، واعترفوا بأن القضية عندها علاقة بالانتخابات و بأن رئيس الجماعة هو اللي خطط لكلشي.
