كود آسفي///

القضية ديال 30 طن ونص ديال الحشيش اللي تفجرات فآسفي باقية كتبين حقائق خطيرة، وكل نهار كيتزاد الملف تعقيد.

وفق المعطيات المتوفرة ل (كود)، البحث اللي كاتقوم به عناصر من الضابطة القضائية ديال الجدارمية فآسفي، من بعد حجز 30 طن ونص ديال الحشيش، وثلاث كاميوات وزوارق مطاطية سريعة وكميات كبيرة من البنزين، فمستودع بدوار الدريدرات بجماعة حد احرارة، وصل لحقائق صادمة وعمليات معقدة بزاف.

الأبحاث بينت أن الأرض اللي فيها المستودع شراها شاب من مواليد 1980 من مدينة مكناس، بـ40 مليون سنتيم بتاريخ 21 يناير 2023 بوثيقة عدلية رسمية.

ولكن المفاجأة الكبيرة هي أن هاد الشاب اللي تسجلات الأرض فاسميتو تبث أنهو فاقد الأهلية من ذوي الاحتياجات الخاصة، وهاد المعطى كيخلي الملف يدخل فمرحلة أكثر تعقيد، لأنه كيشير بقوة إلى استغلال الأشخاص اللي ماعندهمش القدرة على الإدراك، وتوظيفهم كواجهات لتنفيذ عمليات إجرامية كبيرة بلا ما يحسو ولا يعقلو.

هاد التطور كيفتح الباب قدام شبهة جرائم أخرى بحال التزوير واستعماله، النصب والاحتيال، انتحال الهوية، التستر، والارتشاء.

وزيد عليها المخالفات المرتبطة بالبناء، حيث كاين احتمال كبير تكون صدرت رخص بناء باسم شخص مختل عقليا، وإذا ماكانتش الرخص أصلا فراه كاينة تهمة التستر على البناء العشوائي.

هاد السلسلة ديال الخروقات كتجر وراها رؤوس كثيرة، وقد توصل للتحقيق مع مسؤولين وموظفين اللي ممكن يكونو شاركو، سهلو، أو تغاضاو على هاد الأنشطة. الأبحاث مازالت مستمرة، واللي جاي قد يكون أخطر.