گود سبور//

علم جورنال “گود” خبار جديدة على الثلاثي انس صلاح الدين ونصير مزراوي وعبد الصمد الزلزولي، اللي بانت عليهم إصابات قبل وخلال الماتش الودي بين المنتخب الوطني المغربي والنرويج، ضمن الاستعدادات لمونديال 2026.

وكشفت مصادر “گود” اليوم الاربعاء بالتزامن مع الحصة التدريبية للمنتخب المغربي فنيوجيرسي، أن أنس صلاح الدين دار حصة تدريبية فلاصال مع اللاعبين وأنه بقى كايتريني وراهم ونفس الشي بالنسبة لنصير مزراوي، وانهم بجوج غادي يشاركو فالحصة التدريبية فالتيران د التداريب مع لاعبين المنتخب المغربي، في انتظار يقرر الناخب الوطني محمد وهبي شكون فيهم غادي يلعب ضد البرازيل ولا ما غاديش يلعبو بجوج.

أما بخصوص إصابة عبد الصمد الزلزولي فأكد نفس المصدر، ان اللاعب كايخضع لمراقبة طبية مكثفة من طرف الطاقم الطبي للمنتخب الوطني المغربي، وأن الطاقم التقني بقيادة محمد وهبي، غادي يقرر ملي يوصل الوقت االقانوني اي 24 ساعة قبل ماتش المغرب والبرازيل فالجولة الاولى من دور مجموعات كاس العالم 2026، واش غايبقى فلاليست د المنتخب المغربي النهائية بمعنى انه ممكن يلعب الماتشات الجايين من ورا ماتش البرازيل او من وارا ماتش المجموعات، ولا صافي ما يقدرش يلعب وبالتالي غايكون التعويض ديالو بلاعب آخر فلاليست فينال.