كود سبور//

مشاو گلاكسي البوتسواني لتنزانيا باش يلعبو مع سيمبا التنزاني السبت الجاي، الماتش المصيري بين الفريقين ضمن الجولة 6 من دور مجموعات دوري أبطال إفريقيا، فصراعهم القوي مع الوداد الرياضي على التأهل إلى ربع النهائي.

وشدو گلاكسي الطيارة صباح اليوم من بوتسوانا لتنزانيا، واختارو يمشيو بكري لدار السلام باش يوجدو على خاطرهم للماتش ضد سيمبا، وباش يتفاداو أي مفاجأت خصوصا وأنهم عارفين بلي الماتش ضد التنزانيين غيكون صعيب.

وبالنسبة لترتيب هذا الگروب، فأسيك ميموزا الإيفواري تأهل للربع كمتصدر برصيد 11 نقطة وقبل الجولة الأخيرة من لگروبات، وسيمبا التنزاني والوداد الرياضي متساوين فالنقاط بـ6 بوان، ولكن النسبة الخاصة كتعطي الامتياز للتنزانيين (نتائج المواجهات المباشرة بين الفريقين، ووراهم وفالمركز الأخير كاينين گلاكسي البوتسواني برصيد 4 نقاط.

وبخصوص الوداد الرياضي، والحظوظ ديالو للتأهل إلى ربع نهائي دوري أبطال إفريقيا، فالفريق خاصو يربح أسيك ميموزا السبت الجاي فمراكش، ويتسنا كادو من عند گلاكسي إما أنه يربح سيمبا أو على الأقل يتعادلو، أما سيمبا إذا ربحو گلاكسي غيتأهلو مباشرة وما يتسناو حد، أو يتعادلو ويتسناو تعادل الوداد مع أسيك ميموزا، وگلاكسي خاصهم يريحو سيمبا ويتسناو خسارة الوداد مع أسيك ميموزا، مع العلم أن الماتشات بجوج غيكونو ملعوبين فتوقيت واحد.