كود سبور//
كيتاهمو گلاكسي البوتسواني فريق سيمبا التنزاني، بلي دارو لهم شي حاجة دوختهم، باش قدرو يربحوهم فالجولة السادسة والأخيرة من دور مجموعات دوري أبطال إفريقيا، ويتأهلو لربع نهائي المسابقة.
وكشف الجنوب إفريقي مورينا راموريبولي مدرب گلاكسي البوتسواني، لوسائل إعلام جنوب إفريقية، أنه شرب شي عصير ليلة الماتش وملي فاق حس براسو دايخ وبحال إلى سكران، وأن 5 اللاعبين نهار الماتش ما قدروش يفيقو واخا الطبيب ديال ليكيب حاول معهم، وأن ماشي غير اللاعبين اللي وقع لهم هاد الشي ولكن حتى أعضاء من الطاقم التقني، وشاكين بلي دارو لهم شي حاجة فالأكل، وأنهم حاولو يتشكاو لإدارة الفندق اللي كانو گالسين فيه فتنزانيا ولكن حتى حد ما تسوق لهم.
مدرب گلاكسي كشف أيضا، أن الفريق تعرض لمدايقات قبل الماتش ضد سيمبا، وملي بغاو يدخلو للتيران فدار السلام هجم عليهم الأمن فالملعب، وشفرو تيليفون مدرب حراس مرمى گلاكسي.
وكانوا سيمبا التنزاني ربحو گلاكسي البوتسواني فدار السلام بتنزانيا بنتيجة 6 لزيرو، وتأهلو لربع النهائي كثاني الكروب 2، وكون تعادلو أو خسرو كان الوداد الرياضي هو الفريق اللي غيتأهل.