كود سبور//

مازال مستمرين گروبات “الكورفا سود” المساندين للرجاء الرياضي، فالغياب على ماتشات الفريق الأخضر، وما غاديش يكونو فالمگانا اليوم الاحد ضد اتحاد طنجة فستاد دونور ضمن الدورة 13 من البطولة.

“كرين بويز” و”ايگلز” المشكلين لـ”الكورفا سود” مازال ما توصلو بيناتهم لقرار الرجوع للتيران والماكانا، بسبب خلافات داخلية بيناتهم باقيين كايقلبو ليها على حل، وتجنباً لأي مشاكل تقدر توقع فالفيراج الجنوبي مازال مقاطعين ماتشات الخضرا، ولكن كاينين مؤشرات على قرب الرجوع ديالهم.

الگروبات بجوج كانو عند اللاعبين والطاقم التقني فالتداريب قبل ماتش اتحاد طنجة، وشجعوهم باش يخرجو من سلسلة النتائج السلبية اللي طاحو فيها خلال المباريات اللي فاتت، واكدو بلي انهم غادي يكونو ورا الفريق، واخا ما غاديش يباشيو فهاد الماتش، ولكن معولين على باقي الجماهير اللي غادي تمشي للتيران تشجع الخضرا باش تربح.