گود سبور فاس//

كاين اقبال كبير على تيكي ماتشات الاسود الاميكال ضد البينين وتونس بالملعب الكبير بفاس يومي 6 يونيو و9 منه. اقبال كيضرب احتجاج شي گروب اسمو “روسو فيردي” المكون من مشجعين د ليكيب ناسيونال، على أسعار هاد التذاكر

حسب مصادر من جامعة الكورة ل”كود” راه كاين اقبال كبير بزاف على هاد التذاكر. اللجنة المنظمة سبق وحددات اثمنتها فـ 600 درهم للمنصة الشرفية VIP، و 150 درهم للدرجة الاولى، و 100 درهم للدرجة الثانية و70 درهم للدرجة الثالثة.

حسب مصادر “كود” فنهار تحطو التيكي للبيع السبت اللي فات وفظرف ثلث ساعة طارت شي 14 الف تذكرة. هاد الشي خلى اللجنة المنظمة تبدل الاستراتيجية ديال البيع باش يضرب صحاب الكونتر بوند. هادوك اللي كيشريو فللول ويعاودو يبيعوهم ضوبل الثمن.

هاد الشي خلى المنظمين، تقول مصادر “كود”، تبدا تبيع بالتدريج حتى يوصل نهار الماتش.

اكثر من هاد قالت مصادر “كود” ان كثر من 200 الف مغربي تقدمو بطلبات باش يشريو التذاكر. يعني هاد العدد كبير بزاف. كلشي تباع والماتش غايتلعب بگيشي فيرمي.