الرئيسية > آراء > گاليك حكومة وحدة وطنية يرأسها ولي العهد. باحث لـ”كود”: هادا راه انقلاب ضد الملكية بضرب حيادها وهيبتها
04/08/2020 11:00 آراء

گاليك حكومة وحدة وطنية يرأسها ولي العهد. باحث لـ”كود”: هادا راه انقلاب ضد الملكية بضرب حيادها وهيبتها

گاليك حكومة وحدة وطنية يرأسها ولي العهد. باحث لـ”كود”: هادا راه انقلاب ضد الملكية بضرب حيادها وهيبتها

كود سعيد الشاوي كازا ////

خرجات اصوات بدون مناسبة هاد ليام كتهدر على خاص حكومة وحدة وطنية. هاد العبارة بوحدها عوجا. ماشي غير هاد الشي كيطالبو يكون رئيسها ولي العهد. يعني مولاي الحسن اللي عندو 17 عام يرأس هاد الحكومة. بالنسبة للباحثين فالعلوم السياسية اللي هدرات معاهم “كود” فهاد الشي باختصار “انقلاب على الملكية”. حقاش اللي كيقول بهاد الهدرة ما قالش علاش اولا. ثم ما كاينش شي تحليل فيه حسن نية.

الهدف بالنسبة لمن تحدثت معهم “كود” هو “ضرب الملكية”. كيفاش؟ “باغيين يديرو انقلاب على الملك ويحيدو الشرعية ديال ولي العهد باش يولي رئيس حكومة يتلف فالصراعات ويتحرق بسرعة. هاد الشي تضيف مصادر “كود” “كيحيد على الملكية امرين اثنين. الاول الحياد ديالها قدام الفرقاء السياسيين او غيرهم. رئيس حكومة يعني قرارات غادية تعارضها المعارضة وتحتج عليها النقابات وممكن تخلق احتجاجات فالشارع…. ثم تحيد “الهيبة”. صفة مهمة لرئيس الدولة.

هاد التحليل اللي قدموه ل”كود” فيه ان اللي كيطلق هاد الشي كيوجد للمستقبل. شاف الملك فصحة ماشي هي هاديك فالخطاب الاخير وقرا الصحافة الجزائرية اللي بدات تهدر على خليفة الملك وكتوجد السيناريوهات وقال نحرقو صورة ملك المغرب المقبل يضيف مصدر “كود”.

بالنسبة لحكومة وحدة وطنية٫ هنا كاين مشكل كذلك. حقاش وحدة وطنية كتعني كنعيشو ازمة سياسية او وضعية غير مسبوقة. المغرب ما عايش ازمة سياسية. عندو ازمة اقتصادية بحالو بحال كاع دول العالم نتيجة لتداعيات “كورونا فيروس”.

دابا العام الجاي كاينة انتخابات تشريعية وممكن على اساس النتائج تكون الحكومة المناسبة. فكرة حكومة تقنوقراطية اكثر واقعية من حكومة وحدة وطنية واكثر منطقية من حكومة يرأسها ولي العهد

موضوعات أخرى

28/09/2020 19:50

“الأيادي النظيفة” للبوليس باقة كتجبد المصايب ديال مافيات الطاسة المغشوشة فطنجة.. حجز قراعي ديال الشراب المدرح وجر مسيري أوطيلات وريسطورات للتحقيق