سهام البارودي ـ كود//

المونديال دّار للكورة ولا شيء غير الكورة باش الإنسان يتفرج ويستمتع! گاع المونديالات كانتفرجو فيهم بالسكات! وكاتكون البطلة ديالهم هي الكورة ولا شيء غير الكورة ! حتى لهاد العام حيت المونديال نظماتو قطر دولة عربية وبأغلبية مسلمة عاد ولينا كانشوفو بنادم باغي يخلط الكورة بالدين! وانتاشرات أخبار إسلام 500 واحد خلال الأسبوع الأول من وصول المشجعين لقطر! شكون وكيفاش وعلاش؟ الله اعلم لي كاينشرو هاد الأخبار عارفين بلي لي كايقراوهم ماكايتسوقوش للمصادر غير كايقرا  500 واحد اسلم فالأسبوع الأول و كايقول سبحان الله وكايزيد !

طبعا راه باين بلي الفشل هوا المحرك ديال فحال هاد الأخبار! شعوب كاتشوف راسها فاشلة فالصناعات والتيكنولوجيا، شعوب الأغلبية فيها استهلاكية، تابعة، ماعندها مستشفيات مگودة ماعندها طرقان ما عندها حقوق ماعندها ديمقراطية، الناس كايعيشو فالحاضر وكايوجدو للمستقبل وهوما العام لي جا يلقاهم كايبكيو على الماضي وكايتنخصصو على الأندلس! آش كايشيط لهاد الشعوب باش تتباهى بيه؟ كايشيط ليها غا الإسلام وكفى به نعمة! كفى به نعمة زعما غا الإسلام وباراكا! الإسلام بلا كرامة للإنسان وبلا حقوق وبلا وعي وبلا انفتاح وبلا أخلاق، و كفى به نعمة آ عشيري !

اسلم 900 واحد! زعما راه حنا واعرين آ عشيري! بنادم باغي يسلم ويولي فحالنا! فهمتي؟! تا شكون هادو لي سلمو وفوقاش وعلاش؟! لا كانو طبعا هاد الأرقام كاينة! وهاهوما سلمو ألف واحد ولا مليون واحد ومن بعد؟! طفّرناه تا بهاد ملايير المسلمين لي كاينين دابا؟ الدّين لا يعني أنك إنسان ناجح أو إنسان سوي أو مواطن منتج صالح! راه الحباسات اليوم عامرين بالمجرمين المسلمين والطبيب لي كايخلي السبيطار ويمشي يفتح فالكلينيك لعباد الله مسلم والاستاذة لي كاتقول للتلاميذ فالعروبية يجيبو الفطور مسلمة، والشفار لي كايبغي يبيع ليك تيليفون حدا ماكدو د المعاريف مسلم وهاداك الموظف لي كاتمشي نهار الجمعة للمقاطعة وماكاتلقاهش مسلم، هيام سطار وندى حاسي وفتيحة لي خرات فيوتوب مسلمين وو و و… ها حنا مسلمين ! المصريين مسلمين (أغلبيتهم)، الجزائريين، نيجيريا فيها المسلمين والصومال والكاميرون وأفغانستان ومن بعد؟ أغلب الدول لي فيها أغلبية مسلمة مامطفراهش! طبعا كاينين عباقرة مسلمين ومواطنين صالحين مسلمين وعلماء مسلمين (كانهضر على العلماء د بصح الصيونص ماط ماشي شي لاخور)، ولكن كايبقاو قلال وسط مجتمعات طاغي فيها الغش والظلم والاحتكار والفقر !

ملخّر

الإسلام بوحدو ماشي آڤونطاج لي غايخليك تكون أحسن من الناس الآخرين ويقلبو أنهم يشبهو ليك! الدين ديالك بصفة عامّة ماشي آڤونطاج! كاينين حوايج آخرين أهم !

فما كاين لاش تجبدو هاد الموضوع ديال الإسلام راه حنا عارفين خروب بلادي! اسلم مات اسلم! خليو الدين فالتيقار وخليونا نتفرجو فالكورة وكفى بها نعمة هاد الساعة.