كود سبور//

قرر المدرب الإسباني خوان كارلوس گاريدو يمشي يدرب فإيران، بعدما تفارق مع اتحاد العاصمة الجزائري، بعدم موسم صعيب.

كارلوس گاريدو المدرب السابق للرجاء والوداد الرياضيين، سنا مع فريق برسبوليس الإيراني، وغايبدا معه تجربة تدريبية ابتداء من الموسم الجاي، وهي ثاني تجربة له فآسيا حيث فايت له درب العين الإماراتي ولكن النجاح ديالو كمدرب كان مع الرجاء الرياضي ملي ربح مع الفريق كاس العرش وكاس الكاف ومع الاهلي المصري ملي ربح معهم كاس الكاف..

وصعيب التكهن بنجاح كارلوس گاريدو مع الفريق ديالو الجديد حيث السلطات الإيرانية كاتدخل فالكورة، وهو العامل اللي خلاه يهرب من الجزائر بعدما تدخلت السلطات الجزائرية وتسببت فخسارة اتحاد العاصمة اللي كان گاريدو مدرب له الموسم الماضي، ملي حجزت على تونيات نهضة بركان فالمطار بالجزائر فدومي فينال كاس الكاف، وفالروتور منعت الفريق يلعب فبركان فخرق سافر لقوانين الكاف، حيث نهضة بركان دايرين خريطة المغرب فالتوني.