كود سبور//

عبر الإسباني خوان كارلوس گاريدو مدرب اتحاد العاصمة الجزائري، على الإعجاب ديالو بالمركز الرياضي ديال نهضة بركان، وما خباش هذا الشي واعترف به، وهو تأكيد من مدرب عندو تجارب تدريبية فالمغرب والجزائر على الفوارق فمستوى البنية التحتية بين الدولتين وان المغرب هربان فالنيفو على لالجيري.

خوان كارلوس گاريدو اللي جا لمركز تكوين النهضة البركانية صباح اليوم السبت، باش يحضر الندورة الصحافية قبل ماتش نهضة بركان واتحاد العاصمة، ما قدرش يخبي الإعجاب ديالو بالسونطر ديال بركان، وقال: “نهضة بركان فريق كبير وعندو امكنيات كبيرة والتجهيزات هنا فالتيران مانيفيك”.

هاد التعليق اللي دار كارلوس گاريدو بمجرد ما شاف مركز تكوين نهضة بركان، كيأكد أن المدرب حس بالفرق ما بين ظروف العمل فالمغرب اللي متوفرة من تجهيزات رياضية وغيرها، وبالمقابل ضعيفة فالجزائر، ونوع المدربين اللي بحال گاريدو راه ما كيعجبوش العجب وكون ما كانش مركز نهضة بركان طوب ما يقولهاش.