كود – وكالات //

أكدات منظمة الصحة العالمية أن ثمن الڤاكسانات ضد فيروس كورونا خاصها تكون مقبولة عند جميع الدول، الشي اللي يخلي التلقيح يكون متوفر لأكبر عدد ممكن من السكان ديال العالم فـ فترة قصيرة، وهادشي فـ تعليقها على ثمن ڤاكسانات “فايزر” و”موديرنا” اللي طلع.

وقال مساعد المدير العام لمنظمة الصحة العالمية، بروس إيلوارد: “حنا مانقدوش نهضرو على الأثمنة ديال الڤاكسانات، لكن اللي نقدرو نكَولوه، واللي هو أمر مهم بزاف، حنا دابا كانحاولو نوصلو اللقاحات بسعر مناسب لجميع الناس باش نتجاوزو الوباء”.

وزاد أن “أي تغيير فالثمن خاص يكون مبرر بالنفقات اللي كايتحملوها المنتجين، لأن الهدف اليوم هو يتلقحو أكبر عدد ممكن من الناس يتعتقو الأرواح وينقصو عدد الإصابات باش نرجعو للحياة الطبيعية”.

وأكد أن منتجي الڤاكسانات خاص يأخذوا هاد الأهداف بعين الإعتبار فاش يبدلو الأثمنة، باش هادشي ما يعرقلش جهود محاربة وباء “كوفيد-19”.

وكانت جريدة “فاينانشال تايمز” البريطانية قالت بأن شركتي “فايزر” و”موديرنا” الأمريكيتين غلاو ثمن لقاحاتهم فالإتحاد الأوروبي، وولى “فايزر” داير 15.5 حتى لـ19.5 أورو، بينما “موديرنا” 22.6 حتى لـ25.5 دولار لـ ضوز وحدة.