كود سبور//

غايلعب الدولي المغربي يونس عبد الحميد آخر ماتش له مع الفريق ديالو الفرنسي ستاد ريمس، بعدما دار معه كاريير كبيرة.

وغايكون الماتش الجاي ديال ستاد ريمس ضد رين ضمن الدورة 34 من البطولة الفرنسية الاحد الجاي. هو آخر ماتش ليونس عبد الحميد مع ريمس الفرنسي، بعدما اتفق هو وإدارة النادي قبل أشهر، باش ما يجددوش العقد اللي غيسالي مع نهاية هذا الموسم.

وكيتعتبر يونس عبد الحميد واحد من اللاعبين اللي خلاو الاسم ديالهم محفور فتاريخ ستاد ريمس، حيث لعب مع الفريق 250 ماتش لمدة 7 سنين، وحسب موقع sofoot الفرنسي المتخصص فإحصائيات اللاعبين، فيونس عبد الحميد غايخلي بلاصتو كبيرة ملي يمشي من ريمس، والفريق مطالب باش يلقى بديل فوسط الدفاع بالإمكانيات ديالو.

ولعب يونس عبد الحميد مول 36 عام، ففرنسا مع كل من فالينسيان وديجون قبل ما يسني عام 2017 مع ستاد ريمس، اللي قدر يربح معهم عام 2018 بطولة القسم الثاني ففرنسا، ويساهم فصعود الفريق إلى القسم الأول الفرنسي، وقدر يساهم فبقاء الفريق حتى لدابا فالليگ1.