كود كازا ///

كان من المتوقع يدار مجلس ادارة شركة “المغربية للالعاب والرياضة” هاد السيمانا برئاسة وزير الرياضة والتربية الوطنية. هاد المجلس تأجل حسب ما علمته “كود”. طبعا هادي ضربة خايبة لمديرها يونس المشرفي اللي مزوج بنت عباس الفاسي ونسيب الوزير نزار البركة. احد المعمرين فالادارات العمومية. جابوه من شركة للهندسة الرقمية “أركوس” التابعة للهولدينغ الملكي “أونا” وحطوه فعهد الوزير منصف بلخياط. عليها هاد المدير اللي فشل فتقليص عدد لمغاربة اللي كيقمرو بل ضاعفو٬ كيدعي باللي حطو منير الماجيدي مدير الكتابة الخاصة لسيدنا. كيخلع بيه الناس اللي كيقربو منو.

اكيد مجلس الادارة باش يتقرر يدار غادي يجبدو ليه كاع المارشيات اللي مرتابطين بهاد المؤسسة. شي وحدين ما فيديهمش واخدينهم هادي سنوات. واش كيدير طلبات عروض ولا اللا. هاد الشي غادي يبان.

لكن تأجيل عقد مجلس ادارة هاد المؤسسة ضربة ليه ولسياستو واللي ممكن تكشف فضايح كثيرة بزاف وقعات فهاد 16 عام اللي تحكم فيها فهاد المقاولة المغربية التابعة للدولة.

المغربية للالعاب دارتها الدولة ف1962 باش تقنن القمار فالبلاد وتخرجو من الظلام للضو. طبعا الشركة ملزمة بدعم ومواكبة الابطال الرياضيين. شفنا فشلنا فالالعاب الاولمبية. دورها فهاد الميدان كيبقى زيرو. هادا بسباب فشل المشرفي فمهمتو واخا دوز 16 سنة. 

نرجعو للقمر. كانت “الصحيفة” خرجات فاكتوبر 2021 ارقام كتبين فشلو. وكتبات باللي “المشرفي قد عجز عن إبراز أي بصمة لشركة المراهنات في صاحبة منتجات قمار مثل “توتو فوت” و”كوتي سبور” في دعم الرياضة والرياضيين المغاربة، فإنه بالتأكيد نجح في رفع عدد المقامرين والمداخيل المستخلصة منهم بشكل كبير، حيث إن تقريرا قدمته المؤسسة حول معاملاتها المالية سنة 2019 والخاص بنشاطها في سنة 2018، كشف أن عدد المغاربة الذين شاركوا في ألعاب الحظ بلغ 5 ملايين شخص، علما أن تصريحا لها يعود لسنة 2012 كان قد تحدث عن أن إجمالي المقامرين في ألعاب الرهان بالمملكة، بين الذين يلعبون بشكل منتظم والذين يمارسون ذلك بشكل متقطع، يبقى في حدود 3 ملايين شخص”.
اي ان هاد المسير فشل فميلاد ابطال مغاربة كبار وفشل فتقليص عدد القمارة فالبلاد.