الرئيسية > آراء > يوم تاريخي فالدوحة بدا بتقلب غريب بزاف للجو. طاحت الحرارة وكثر لغيام وتفرقات 4 الاف تذكرة وطلعات السوق السودا
10/12/2022 08:48 آراء

يوم تاريخي فالدوحة بدا بتقلب غريب بزاف للجو. طاحت الحرارة وكثر لغيام وتفرقات 4 الاف تذكرة وطلعات السوق السودا

يوم تاريخي فالدوحة بدا بتقلب غريب بزاف للجو. طاحت الحرارة وكثر لغيام وتفرقات 4 الاف تذكرة وطلعات السوق السودا

كود الدوحة ///

هاد الصباح فالدوحة تغير الجو. تبدل بزاف. من الحرارة جا لغيام والريح مع البرد. كلشي وقع بسرعة. ما كانش هاداك الانتقال التدريجي. صبحات درجة الحرارة فحدود 21 درجة وكاينة توقعات تصب الشتا فشي مناطق قطرية كيف قالت النشرة الجوية ديالهم.

تحول موالم لمورال المغربي فهاد النهار التاريخي. مع الستة اليوم بملعب التمامة لاعبين الاسود ضد البرتغال فربع نهاية كأس العالم. غير هادي بوحدها راها تاريخ واعر. اما ايلى هاد الجو عاونا مع الجمهور وطبعا الاسود يكونو كيف عودونا فهاد المونديال فنهارهم٬ راه غادي ندوزو مرحلة جديدة فكتابة التاريخ.


هنا فالدوحة بادي اليوم بناس قلال. البارح كانت لقصاير والنشاط فبلايص مختالفة. صحاب الكاباريات هزو الراية وغناو للمغرب ورددو “سير سير سير” وشطحو على العلاوي وشربو كيسان الفرحة واخا سبقوها بليلة علي الشعبي والراي.  فمناطق اخرى كانت اجواء كلها افراح ونشاط.

هاد الصباح فالميترو باقيين لمغاربة ناعسيين باسثتناء اللي مشاو دوزو ليلة كاملة فسطاد الجنوب باش خداو التذاكر. بوريقة محمد عضو المكتب الجامعي قال ل”كود” باللي توزعات هاد الصباح= سالى التوزيع مع لحداش ونص توقيت قطر = 4 الاف تذكرة. 
طبعا ماشي كلشي باغي يتفرج. شي مواطنين قالو ل”كود” باللي شدوها تماك باعوها ل600 ريال واخا ثمنها =الدرجة الثالثة= 750 ريال وفالسوق السودا طلعات بزاف. 
هاد 4 الاف كان عندهم الزهر وصافي. راه مشات شي 6 الاف مغربي. دابا تكون مغربي ولات شي حاجة زوينة. “كود” تلاقات مع اماراتي جاي وما عندوش تذكرة. قال ل”كود” باللي نصحو شي ولد بلادو باش يمشي للسفارة ويقول ليهم راه مغربي وراه ياخذ تذكرة ماتش جاي خصيصا باش يشوفو. هادا مستاعد يعطي حتى الفين دولار فتذكرة ثمنها 215 دولار
مغاربة كثار وصلو اليوم فرحلات لارام ما عندهم تذاكر. جاو ومعولين علي هاد التذاكر اللي تفرقات وعلى صحابهم وعلى السوق السودا. ايلى ما لقاوش يتفرجو فقهاوي واوطيلات الدوحة
كلشي هاد الصباح غادي بالشوية. بحال شي مشهد ففيلم الاخوة كوين. هادوك الافلام اللي من بعد كيتحرك فيهم الايقاع بطريقة كتفاجأ المشاهد. بغينا شي مفاجأة زوينة وشي تأهل للنصف. ودابا الواحد يردد مع شي 6 لمغاربة كيهدرو مع قناة خليجية فحي مشيرب وكيرددو “سير سير سير” تماركي.

موضوعات أخرى

02/02/2023 13:03

مساج واضح من المغرب لإسبانيا..أخنوش لحكومة سانشيز: الشراكة خصها تكثيف الجهود لمواجهة خطر الإرهاب والهجرة والمجموعات الانفصالية والمسلحة منها (البوليساريو) وهاد العلاقات فتحات باب لمشروع الرباط القاري بين البلدين

02/02/2023 12:30

البرد مزال مستمر فبلادنا.. درجات الحرارة غادي تتراوح بين ناقص 7 و19 درجة ابتداء من غدا حتى لبداية السيمانة الجاية وها البلايص المعنية

02/02/2023 12:15

افتتاح الموندياليطو بطنجة. لا بريطل لا مزند دارو شي حاجة. بجوجهم كومبارس فحفل افتتاح خدموه لفرانساويين ومعاهم شي طاليانيين

02/02/2023 11:44

كانو باغين الملك يعين الرئيس.. التويزي مسؤول فريق البام بمجلس النواب لـ”كود”: ها علاش سحبت الاغلبية مقترح تعديل قانون المجلس الوطني للصحافة والهدف الكبير هو تقوية رئاسة المجلس باش تكون بعيدة على التأثيرات والصراعات

02/02/2023 11:40

الشناوي حارس الأهلي: كنشكر المغرب والشعب المغربي على استقبالهم لنا والمغاربة كان عندهم دور كبير فتأهلنا للربع