الرئيسية > كود سبور > يوميات «كود» فياوندي. ميلا ضد «ليبلان» وايريك المسهل مع كلشي وكورونا اختارقات الحصار فالمنتخب والشعب مهووس بالبيرا والكورة
08/01/2022 19:00 كود سبور

يوميات «كود» فياوندي. ميلا ضد «ليبلان» وايريك المسهل مع كلشي وكورونا اختارقات الحصار فالمنتخب والشعب مهووس بالبيرا والكورة

يوميات «كود» فياوندي. ميلا ضد «ليبلان» وايريك المسهل مع كلشي وكورونا اختارقات الحصار فالمنتخب والشعب مهووس بالبيرا والكورة

كود ياوندي ///

يومين فياوندي كتحس براسك مدوز فيها شهر. لعيا. التسخسيخ. التعصاب فمدينة مساحتها كبيرة بزاف على جوج المليون و700 الف نسمة اللي ساكنين فيها. كلشي فيها متبع. تمشي لحي اوليمبي باش تشوف التيران الجديد الزوين اللي غادي يحتاضن افتتاح الكان غدا فماتش الكاميرون ضد بوركينا فاسو تسخسخ. تطلع لاحياء كوندونكو وكورون وفودا واومام بيك تولي تندم على النهار اللي فكرتي فيه فشي كان.

موسى الشيفور كالم. غير كيضحك. هدا عندو مشكلة وحدة هو وقت الصلاة يخليك ويمشي. ما كاينة خدمة.

اللي داير هاد الزحام ماشي غير الفوضى فحركة السير بل الطاكسيات الصوفر ديالهم. رخاه الله. يوقفو ليك فدوزيام حتى الطروازيام بوزيسيون فشوارعهم الضيقة وما على بالهمش.

موسى كيقول باللي باش تغلب على هاد الستريس خاصك تطلق النفس.

هنا كلشي طالق النفس. حدا القصر الرئاسي فحي ايتودي او الحي اللي وراه باسطوس٬ وهو حي لمرفحين٬ يالله اليوم خرجو صحاب الصباغة. كيصبغو كاع الطريق اللي غادية من القصر الرئاسي اللي فيه رئيسهم الابدي بول بيا٬ حتى السطاد الجديد باوليمبي كلشي خدام. صحاب الضو وصحاب الصباغة وصحاب تعلاق اللافتات وصحاب النظافة. هاد الشي كاين حتى فالتيران الجديد

فالسطاد اليوم كانت القضية مزيرة. الخوف من الارهاب مهيمن على ناس الكاميرون كيف عاينات كود. ماشي البوليس اللي مكلف بمراقبة الطونوبيلات اللي كيدخلو. الجيش هو اللي مكلف. مسلح مزيان وواقف. الجيش كاين بزاف فكاميوات كيتسنى حدا التيران اللي مازال فيه الخدمة على برا. كتحس باللي ما واجدش واخا شكلو الخارجي كيعطي الانطباع العكس.

هاد الطريقة فالتعامل مع الاحداث وسياسة رخاها الله كيتبان اكثر فاريك. هادا موظف فالمطار. خدمتو هو مسهل الخدمات كيف قلنا فمقال سابق. كيسهل كلشي. بدرجة انو يخرج من الخدمة ويمشي يوصلك لبلاصة بعيدة. هانية.

غير هاد الاسلوب فوقت كتزاد فيه حالات كورونا واش غادي يخرجهم. موحالش. التيست كيف نقلات شهادات ل »كود » كيتشرى. تعرضات على هادو شهادات فيها باللي « سلبي ». شهادة تخليه يدخل للماتشات. تدبير هاد الشي ديال ليتيست فيه بزاف القيل والقال.

كاين تخوف ايلى شي فراقي كيديرو التخوفيش فهاد الشي. ايلى داروها تقدر تكون عواقب هاد الشي كارثية على اللعابة. فيك كورونا وتلعب ماتش تقدر تموت.

اليوم علنات بوركينا فاسو باللي عندهم 3 لعابة فيهم كورونا مع المدرب ومنتخبات اخرى عندهم حالات. المغرب حتى هو وصلاتو اولى الحالات.

لمغاربة ولاو حديث هاد الكان مع المصريين. تداعيات هجوم روجي ميلا عليهم باش قال ايلى ما عجبهمش الكان يمشيو يلعبو مع اوربا منوضة الصداع. كلشي كيهدر عليها.

روجي ميلا كيهدر على شمال افريقيا بنوع من الاستعلاء. هاد الشي كتحس بيه فمحلات هنا. ما كيسميونا الا « ليبلان » واخا حنا ماشي بيضين. والو حاسبينا مع اوربا.

الكاميرونيين وباش يغطيو على مشاكلهم فالتنظيم رجعو هاد الموضوع هو موضوع الساعة. جبدو حتى باش المغرب جاب كلشي لفرقتو. دول اخرى جابتو ولكن ما هدروش عليها فالصحافة.

الكاميرون مصدقين فالشارع ديالهم باللي الكاس غادية تبقى عندهم. باللي دايرين تنظيم واعر. فاسواقهم اكثر حاجة كتباع هي التونيات ديالهم. تونيات لعابة ما بقاوش مازال مطلية بيها اسواق المدينة بحال « ايطو ». شعب مجنون على كورة والبيرا. هادو مع الشطيح فالليل كينساو الحياة.

موضوعات أخرى