عمر المزين – كود////

دعا الحسين يوعابد، المسؤول على التواصل داخل الأرصاد الجوية، الناس باش ترد بالها مزيان مع هاد الأحوال الجوية اللي دايزة منها بلادنا هاد الأيام.

المسؤول اللي هضرات معاه “كود” كيوصي بالحذر مزيان والوقاية للحد من المخاطر المحتملة المرتبطة بالشتا اللي مجهدا، والرياح اللي قوية، والتساقطات ديال الثلوج وبحر قوي فالساحل الأطلسي.

الأرصاد وصات عبر “كود” باش يكون الالتزام بالتعليمات ديال السلطات المحلية ومصالح الوقاية المدنية، وهادشي الهدف منو هو الحفاظ على سلامتهم وسلامة ممتلكاتهم، وتجنب التنقل غير يلا كانت شي حاجة ضرورية.

يوعابد دعا فهاد السياق باش الناس تبعد عن مجاري الأودية، والمنخفضات، وحتى الأنفاق، وعدم محاولة الدوران حدا الطرق اللي فيها الما بزاف، مع تجنب التنقل فالمناطق الجبلية أو حدا لويديان أثناء أو بعد هطول الأمطار والثلوج.

المسؤول على التواصل داخل الأرصاد دعا الناس عبر “كود” باش تاخد الحذر على الطرق خاصة في المناطق الجبلية أو بعد تراكم الثلوج.