كود سبور//

طاح المنتخب الكرواتي فنتيجة سلبية جديدة فكأس أوروبا ’’ألمانيا2024‘‘، بتعادل بطعم الخسارة أمام المنتخب الألباني اليوم الأربعاء، برسم الجولة الثاني من دور مجموعات البطولة، وهذا الشي بعدما بدا المسابقة بطريقة كارثية ملي كانو خسر الجولة الأولى مع الصبليون بـ3 لزيرو.

وسالا الماتش بين كرواتيا وألبانيا بنتيجة التعادل الإيجابي جوج لجوج بين المنتخبين، والماتش ما كانش ساهل بالنسبة للوكا مودريتش وصحابو، حيث الألبانيين ماركاو الأولين وخرجو رابحين الشوط الأول بنتيجة واحد لزيرو بهدف ماركاه الألباني كازيم لاسي فالدقيقة 11.

وفالشوط الثاني قدرو كرواتيا يرجعو فالماتش، ونجح اندريگ كراماريتش فتسجيل التعادل بهدف فالدقيقة 74، ومن وراها بجوج دقايق قدرو الكروات يزيدو الهدف الثاني، واللي ماركاه الألباني كلاوس گجاسولا على راسو فالدقيقة 76، وفالوقت اللي كان كلشي كيتسنى الماتش يسالي برباح كرواتيا خرج الألبانيكلاوس گجاسولا وصحح الغلط ديالو وحرمهم من الرباح وضرب التعادل لألبانيا بهدف قاتل فاللحظات الأخيرة.

وبهذا التعادل خدا منتخب كرواتيا أول نقطة له فكأس أوروبا 2024، وكيحتل المركز الرابع والأخير فالگروب 2 ورا المنتخب الألباني مول المركز الثالث بامتياز الأهداف، وكل واحد فيهم عندو نقطة واحدة، في انتظار نتيجة ماتش الصبليون والطاليان اللي كل واحد فيهم عندو 3 النقاط.