كود سبور//

ربحت تركيا الجارة ديالها جورجيا فماتش مشوق شابع تعصب بخلفيات تاريخيّة وسياسية وعرقية وحتى دينية بين البلدين الجارين، تلعب اليوم الثلاثاء، ضمن الجولة الأولى من دور مجموعات كأس أوروبا “ألمانيا 2024”.

وما قدرت تركيا تحسم الرباح على جورجيا حتى الدقيقة الأخيرة من الماتش بيناتهم، اللي سالا بنتيجة 3 لواحد لمصلحة الأتراك، واللي قدرو يماركيو الهدف الأول فالدقيقة 25 بواسطة ميرت مولدر، وماركات تركيا من وراها هدف ولكن الحكم حيدو بداعي التسلل، وقدرت جورجيا ترجع فالماتش بهدف التعادل فالدقيقة 32 بواسطة جيورج ميكوتادزي، وهكذا سالا الشوط الأول بالتعادل واحد لواحد.

وفالشوط الثاني قدرت تركيا تماركي هدف التقدم مرة اخرى فالماتش عن طريق أردا گولر فالدقيقة 65، وخرجو من وراها لاعبين جورجيا كيقلبو على هدف التعادل وخلقو فرص خطيرة بزاف منها اللي ضرب فالعارضة واللي حبسها الگول التركي، أما الأتراك رجعو إلى الوراء كيدافعو وكيلعبو على الكونطر أطاك، وبقى الوضع كيفما هو بين المنتخبين حتى الدقيقة الأخيرة فين استغل منتخب تركيا صعود الجورجيين كاملين بما فيهم الگول باش يقلبو على التعادل، وخطف كريم أكتورك أوغلو هدف ثالث قاتل للأتراك سالا به الماتش.

وبهذا الرباح خداو تركيا 3 نقاط بصمو بها على بداية مزيانة فكاس اوروبا 2024، ودابا كايتصدرو بوحدهم الكروب 6 في انتظار معرفة نتيجة ماتش البرتغال ضد التشيك اللي غايلعبو اليوم الثلاثاء بالليل، أما جورجيا اللي كان هدفها على تركيا فماتش اليوم هو أول هدف لها فتاريخ مشاركاتها فكأس أوروبا، كتحتل المركز الاخير بصفر نقطة.