سعيد الشاوي – كود ///

ديما كنقولو وزير الخارجية والتعاون ناصر بوريطة مهووس براسو. ما ينعسش ايلى ما تصورش ومواقع الوزارة فالتواصل الاجتماعي خرجو تصاورو.

آخر خرجاتو فهاد السياق، هو التدوينة الاخبار اللي حطات صفحة الوزارة على الفايسبوك مع لطناش اليوم الثلاثاء 22 أبريل 2025. فيها يا سيدي باللي سيدهم بوريطة تلاقى مع عمدة مونبوليي الفرنسية.

مدينة سكانها شي 300 الف نسمة. ماشي مدينة مهمة ففرانسا. ماشي باريس ولا مارسيليا مثلا.

ثم انت يا وزير الخارجية علاش تلاقى بعمدة مدينة. أنت أصلا ما عمرك كنتي منتخب ولا حتى سفير كيفهم فداك الشي ديال تعاون بين دولتين

هاد العمدة اللي ماشي فبداية ولايتو، كان ممكن يتلاقى بيه عمدة مدينة مغربية.

لكن بوريطة يحب بوريطة اكثر من شي حاجة اخرى. السيد عندو عرام الملفات. غير الصحرا بوحدها ممكن تدي ليه وقتو كولو. هو نيت بالله دار جولات مكوكية رسلو سيدنا ليها لعدد كبير من الدول الاوربية وغيرها.

دابا محتاجين وزير خارجية رزين وماشي مهووس براسو وظهورو فالإعلام.