كود – وكالات //

تزعزع الرأي العام فالنمسا، بعدما وجّهو المدّعين العامّين تهم إرهابية لشاب عندو 21 عام، بتهمة التخطيط لهجوم إرهابي على واحدة من حفلات النجمة العالمية تايلور سويفت فمدينة فيينا، فجولة “Eras Tour” فغشت 2024، السلطات كانت توصلات بمعلومات خطيرة على مؤامرة، الشي اللي خلاهم يلغيو ثلاث حفلات دقة وحدة، فقرار أمني استباقي جنّب كارثة حقيقية.

التحقيقات السرية بيّنات بلي المشتبه فيه كان علن الولاء لتنظيم الدولة الإسلامية داعش، وكيشارك مواد دعائية ومقاطع فيديو فتطبيقات الهضرة، وتلقى تعليمات بالإنترنت كيفاش يصايب قنبلة باستعمال مادة كتفجر معروفة عند التنظيمات المتطرفة.

المدّعون قالو حتى أنه قدر يصايب كمية صغيرة من المتفجرات، وحاول كثر من مرة يشرّي أسلحة بطرق غير قانونية ويدخلها للنمسا من الخارج، القضية ما وقفاتش هنا، حيث كاين شبهات على أنه كان متورّط فالتخطيط لهجمات أخرى برا النمسا، من بينها دبي وإسطنبول، السلطات النمساوية أكدات أنها غادي تمشي فالمساطر القضائية حتى للخر، والمشتبه فيه موقوف دابا فانتظار المحاكمة، لي ممكن تسيفطو حتى لـ20 عام ديال الحبس.

من جهة أخرى، كشفت المعطيات بلي مريكان  شاركات بمعلومات استخباراتية مهمة عاونات  فإفشال العملية، وهاد الشي اللي أكدو  البيت الأبيض فداك الوقت. تايلور سويفت علّقات على الإلغاء وقالت باللي القرار خلاها تعيش إحساس بالخوف والذنب حيت بزاف ديال الناس كانوا غيحضرو لداك العرض.