وكالات//

توجّهات لنيك راينر، ولد روب راينر المخرج المعروف وزوجتو ميشيل سينجر راينر، جوج تهم ديال القتل العمد، من بعد ما تلقاو الزوجين ميتين فدارهم فـلوس أنجلوس.

مكتب المدعي العام ديال مقاطعة لوس أنجلوس، ناثان هوشمان، علن على هاد التهم نهار الثلاثاء اللي فات، من بعد يومين على العثور على الجثتين. نيك راينر، اللي عندو 32 عام، تشد نهار الأحد اللي فات.

وحسب جريدة “إندبندنت” البريطانية، قال هوشمان باللي راينر متهم باستعمال سكين فتنفيذ جريمة القتل المزعومة. والتهم كتشمّل جوج ديال القتل العمد من الدرجة الأولى مع ظرف خاص حيث كيتعلّق بارتكاب جرائم قتل متعددة، وزيد عليها تهمة استعمال سلاح قاتل بشكل شخصي. وإذا تبثات عليه التهم، يقدر يواجه عقوبة السجن المؤبد بلا إفراج مشروط، ولا حتى حكم الإعدام، رغم أن القرار بخصوص الإعدام ما تزادش فيه لحد الساعة.

ودابا راينر كيدوز من الفحص الطبي العادي اللي كيتدار لجميع المعتقلين فسجون مقاطعة لوس أنجلوس. ومن بعد ما يسالي الفحص، غادي يمثل قدّام المحكمة باش يصرّح واش مذنب ولا كينفي التهم. وكان مقرر يطلع للمحكمة نهار الثلاثاء ف الصباح، ولكن تأجل الظهور ديالو حيث ما كملش الفحص الطبي، ودابا راه مشدود بلا كفالة.