گود كازا//

عرف المنتدى الدولي حول الرياضة اللي تنظم فـ البرلمان، البارح الخميس حضور عدد الشخصيات اللي كانت مسؤولة فـ المجال الرياضي والإعلامي خلال السنوات الماضية ولكن بدون ما تقدم الإضافة ولا تقدم تحقق النجاح من بينها فيصل العرايشي الرئيس المدير العام للشركة الوطنية للإذاعة والتلفزة.

وقال فيصل العرايشي فـ كلمة له بهاد المناسبة انه “لا يمكن بلوغ رياضة فـ المستوى بدون اعلام رياضي قوي، وهذا علاش خاص نتطرقو الى تكوين وتوسيع الفاعلين فـ هاد الميدان”، ودبا إلى كان هذا المسؤول الاول على قطب الإعلام العمومي كايقول هاد الهضرة، شنو خلى للمتتبع العادي ما يقول؟ وهو اللي عليه فيه يكون ساهر كمسؤول على تطوير الإعلام الرياضي العمومي بإستراتيجيات وقرارات أهدافها ملموسة بالنظر للإمكانيات الكبيرة المتوفرة.

والسؤال اللي خاصو يتطرح هنا هو علاش مثلا مستوى قناة الرياضية ضعيف وناقص بزاف، والكفاءات فيها قليلة؟ وعلاش ما كاينش استثمار فـ العنصر البشيري فـ هاد القناة؟ وهي القناة اللي المفروض فيها تواكب الأحداث الرياضية اللي كايعرفها المغرب والمساهمة فـ إنجاحها بحكم التخصص، ولكن على العكس فـ القناة ولات خارج التغطية فـ اغلب الوقت، وغير دبا مثلا فـ كاس افريقيا اللي منظمها المغرب، ما كايناش مواكبة او تغطية إعلامية من الرياضية لهاد الحدث بالقيمة اللي كايتسناوها المغاربة وهذا الشي عادي يخلي اغلب الجمهور المغربي يمشي لقنوات اجنبية كيف كايدير ديما.

طبعا تغطية ومواكبة الأحداث الرياضية فـ قناة رياضية متخصصة ما غاديش تجي غير هاكداك ولكن محتاجة لكفاءات اللي تقترح افكار وبرامج وتجسدها على ارض الواقع، والمتتبع العادي راه ولى كايلاحض ان قناة الرياضية تفتقر لهذا الشي، فـ الوقت اللي المسؤول الاول على قطب الإعلام العمومي خارج كاينظر، وكأن هذا الوقت اللي شرف فيه هو على هذا القطاع كانت الحصيلة ديالو مزيانة وناجحة وكلشي زوين، ولكن العكس هو اللي واقع فـ قناة الرياضية اللي كاتعاني على مستوى ضعف العنصر البشاري من صحافيين وغيرهم اللي قادرين يعطيو الاضافة.

غير هو راه ما كاين حتى شي مش كايهرب من دار العرس، حيث عدد من الصحافيين اللي كانو خدامين فـ الرياضية، ولا فـ قنوات عمومية أخرى، مشاو لقنوات اجنبية على برا وفـ الخليج، وقدور يتألقو ويديرو بلاصتهم وهذا الشي كايبين ان المشكل فـ المسؤول على تدبير القطاع، وماشي المغرب اللي ما بقاوش فيه الكفاءات الإعلامية والصحافيين الرياضيين، بالعكس المغرب فيه الكفاءات فـ الإعلام الرياضي، خاص غير اللي يرد لهم البال ويعطيهم حقهم من توفير ظروف العمل والاستثمار فـ العنصر البشري باش يعطيو منتوج اعلامي رياضي مزيان وقوي وكايلبي حاجة المتلقي المغربي، اللي منحقو يشوف فـ التلفزة المغربية قناة رياضية قوية بهوية مغربية.