وكالات//

علنات السطات فالسعودية، الثلاثاء، أنها لقات واحد المواطن إماراتي كان تالف في الصحراء الكبيرة والمعروفة بالربع الخالي من هادي 3 أيام.

المواطن الإماراتي لي سميتو أحمد المنهالي كان تالف من نهار السبت لي فات، مللي كان غادي لواحد العراضة وهو يدخل للصحراء دالسعودية وتلف فيها.

التحقيقات دالبوليس لقات أن أخر اتصال ليه دارو من سطاسيون ديال المازوط فالسعودية قبل مايطفا ليه التيليفون وهو يغبر هو والطوموبيل ديالو من نوع “نيسان باترول”.

كاتعرف السعودية كل عام عدد كبير من هاد الحوادث، دالناس لي كيتلفو ف الصحراء، على حساب مكتقول هيئة الإنقاذ دالسعودية.

فعام 2021، علنات الهيئة أن 142 واحد تلفو، مات منهم 28 واحد، و100 خرين لقاوهوم، ومالقاو حتى خبار على 14 واحد.

وفي تقرير آخر نشراتو الهيئة، في 31 أكتوبر 2022، وصل عدد لي تلفو 131 واحد، لقاو منهم 100 ومزال لدابا ماعارفين والو على 11 واحد آخر.