كود كازا ///

الوفد لكبير بزاف بزاف من الباطرونا اللي مشى لاسرائيل فتدشين “لارام” خط كازا تل ابيب الاحد اللي فات طلعو فيه رجال اعمال مزورين.

وفق مصادر “كود” فجوج من هاداك الوفد اللي فيه كثر من 65 رجل اعمال٬ باش دارو ليهم تيست فمطار بنگوريون بتل ابيب٬ طلعو پوزيتيف. يعني ان البي سي ار اللي داوه من المغرب مزور.

طبعا هاد الجوج تفرشو ودابا خاص يديرو لاكارانتيت ويعاودو التيست اليوم فالعشية ولا بقاو بيزيتيف ما يقدروش يرجعو فالطيارة اللي غادية ترجع غدا لكازا.

كلشي اللي مشى لاسرائيل من الوفد طلبو منو البي سي ار زائد طبعا الباس ڤاكسينال٬ وباش كيوصلو للمطار٬ بحالنا٬ كيديرو تيست اخر.

دابا هادو رجال اعمال دالمغرب فوفد رسمي وما قدروش يديرو التيست بي سي ار وجابو شي حد زورو ليهم.

خاصهم باش يدخلو للبلاد يتابعوهم بتهمة التزوير. ما يمكنش الدولة تابعات مواطنين زورو البي سي ار” قبل وهادو تخليهم.