وكالات//

دار الأزياء الفرنسية بالنسياگا Balenciaga ناضو ليها الناس والفنانين والمشاهر وكولشي بسبب الحملة الاشهارية الاخيرة لي دارت اللي سميتها “Gift Shop” للكوليكسيون ديال الربيع والصيف 2023، واللي استعنت فيها بأطفال وبيناتهم في تصاور هازين نونوسات لابسين حوايج ديال الـBDSM.

التصاور لي نوضو الروينة وخلاو الناس يتاهمو لامارك بانها كدير البورنو ديال الدراري الصغار وانها كتشييئ الاطفال، بانو فيهم الدراري فوق ناموسية واقفين او ناعسين، وهازين داك الدب لابس داكشي جنسي! واكثر من هادشي، بعض الناس لاحظو ان فوحدة من الصور، كاين صاك ديال لامارك مع اديداس Adidas محطوط على وراق وضوصيات فيهم قرار ديال المحكمة العليا الامريكية على قضية ديال المواد الإباحية المتعلقة بالأطفال!

بزاف ديال المشاهير منهم الممثلة ديال لامارك، كيم كارداشيان، هضرو وقالو انهم كيتبراو من Balenciaga، وانهم غادي يوقفو الخدمة معها..

الماركا الفرنسية قدمات اعتذار ونشرات بيان وقالت انها مشات للقضاء باش تحاسب الناس لي خلاو الضوصي يبان فالصور، واكدات انها مكانتش باغة ترد الاطفال اداة جنسية واعترفات ان الحملة كانت ديبلاصي وبزاف.

ودابا حذفات الماركا الفرنسية التصاور لي نوضو الصداع، ولكن فعهد انترنيت حتى حاجة مكتحذف بصح، واصلا اللي كان كان والضرار وقع.