الرئيسية > آراء > ياك گلنا ليكم راه خفيف. بوريطة لـ”كود”: ميرسي بوكو
09/10/2021 13:00 آراء

ياك گلنا ليكم راه خفيف. بوريطة لـ”كود”: ميرسي بوكو

ياك گلنا ليكم راه خفيف. بوريطة لـ”كود”: ميرسي بوكو

كود هناء ابو علي ///

كثار كيعتاقدو ان “كود” تتحامل على وزير الخارجية والتعاون ناصر بوريطة. ابدا. “كود” كتقول باللي ماشي هو الشخص اللي كيحاول يصور بيه راسو. سوبرمان كيدير كلشي.

الخارجية قطاع سيادي بيد رئيس الدولة. بوريطة منفذ. هاد المنفذ٬ كيف عشنا طيلة عشرين سنة٬ كيقدر يبدع وكيقدر يخربق وكيقدر يدير اللي خاصو يدار.

فقضية بوريطة بالنسبة ل”كود”٬ كان تهور كان التسرع فالتعاطي مع قضايا دولية. بعد تشكيل الحكومة واللي بقى فيها وزير الخارجية٬ كيف توقعات “كود” قبل٬ واخا هو خرج دبانو الالكتروني يدافع عليه ويردد “بوريطة يمثلني”٬ بلادنا اليوم محاصرة.

محاصرة من الشرق من قبل الجارة الجزائر ومن الجنوب مع ما يقع فالساحل واللي خلط الاوراق فهاد المنطقة بدخول الروس لمالي وتخلي الفرنسيس عليهم وبداية تعاون ايراني روسي عبر مرتزقته فاگنر للبوليساريو وفالشمال مع استمرار الازمة مع اسبانيا واخا سيدنا قال فخطابو باللي امور فطريق الحل.

محاصرة فالشمال حقاش الحدود البحرية مازال مسدودة. الحدود البرية مع المديتنين المحتلتين سبتة ومليلية مازال مسدودة.

العلاقات مع المانيا مكفسة وهي اللي كتجر اوربا. العلاقات مع فرانسا ماشي حتى لهيه مع الانتخابات اللي عندهم اللي كتاثر على قرارات الدولة كيف وقع مؤخرا بخصوص خصم عدد الفيزات الممنوحة للمغاربة.

طبعا ما بلا نهدرو على امريكا اللي واخا مستمرة فالاعتراف بمغربية الصحراء٬ كتاخد مسافة مع ادارة بايدن. كتهدر على حل سلمي علي مفاوضات. شفنا اش قالو علي تعيين الممثل الخاص للامين العام الاممي المكلف بالصحراء. نيد برايس المتحدث باسم الخارجية الامريكية قال ان واشنطن ستدعم جهود دي ميستورا” واخا اكد باللي ما عندو ما يزيد فقضية اعتراف بلادو بمغربية الصحراء

تصورو هاد الوضع كامل بلا ما نهدرو على علاقاتنا بافريقيا وبدول الشرق الاوسط والسي وزير الخارجية ناصر بوريطة لقى الوقت فهاد الشي كولو رسل ميساج ل”كود” فيه عبارة “ميرسي بوكو”

بوريطة كيطنز. كيقول هانا بقيت وزير الخارجية وشفتو وكلشي اللي كتبتوه ما غير والو.

حنا كنكتبو ماشي كنملكو الحقيقة. كنكتبو تعبير على راي علي موقف. كاين عندك ناس كيدعموك. خدمتك هو تكون ديبلوماسي حقيقي لغة وذكاء ماشي تصرفات صبيانية ديال وشفتو ها انا ربحتكم.

حنا المهم عندنا ماشي بوريطة هو بلادنا. بوريطة المهم عندو هو راسو. هادا هو الفرق. رسالتو بينات شخصيتو اللي ديما كنتاقدوها واللي كتاثر على الديبلوماسية المغربية بشكل او باخر واخا بيد مول لبلاد. لحسن الحظ انها بيدو ماشي بيد مول “ميرسي بوكو”

موضوعات أخرى

20/10/2021 21:00

نايضة على تعليق عنصري دارو موقع “So foot” الفرنسي على حكيمي والمغاربة.. ومن بعد بزاف ديال الانتقادات بدلو التعليق وحاولو يفسرو

20/10/2021 20:30

ترونات عاوتاني بسباب كورونا.. ها تفاصيل وقف المغرب للرحلات الجوية مع بريطانيا وتأثيرو على قطاع السياحة وتنقل الأشخاص المرتبطين بهاد البلدان