كود سبور//

كايبان أن الدولي المغربي الشاب ياسين جاسم ما غاديش يطول مع ستراسبورگ الفرنسي، وغادي يمشي لفريق كبر من هنا للموسم الجاي أو اللي من وراه، بالأداء القوي اللي بينو مع الفريق الفرنسي.

المهاجم المغربي ياسين جاسم تألق مع ستراسبورگ البارح الثلاثاء فأول ماتش غادي يلعبو كلاعب رسمي، واللي كان ضد نادي ستاد ريمس ضمن ربع نهائي كاس فرنسا، وقدر يساهم فتأهل الفريق ديالو للدومي فينال.

وخدا ياسين جاسم جائزة رجل الماتش بين ستراسبورگ وستاد ريمس، بعدما قدم مستوى واعر، ودار 6 المراوغات ناجحين، وربح 14 مرة الثنائيات مع الخصم، وعطى 15 تمريرة حاسمة فالثلاث الهجومي الأخير فمنطقة الخصم.

المستوى ديال ياسين جاسم استفزّ جماهير الكورة فأوروبا، ومنها جماهير تشيلسي النگليزي، واللي خرجت لمواقع التواصل الاجتماعي وكاتناقش مستوى النجم المغربي الصاعد، وكاتمنى يكون عندهم فالفريق ديالهم شي مرة، وكاين اللي منهم شبهو بالنجم ديالهم السابق، البلجيكي هازارد.

هذه الأرقام كاتبين أن ياسين جاسم مول 20 عام، وبطل العالم مع المنتخب الوطني المغربي للشباب تحت قيادة المدرب محمد وهبي الناخب الوطني الجديد للمنتخب المغربي الأول، (كاتبين) أنه اللاعب عندو إمكانيات كبيرة وغادي يعطي بزاف للمنتخب الأول ملي تعطاه الفرصة ديالو، هو وعثمان معما وياسير الزابيري وغيرهم من نجوم منتخب الشباب أبطال العالم