كود سبور//

استقبل الهلال السعودي النجم ديالو المغربي ياسين بونو، بعدما رجع للفريق من المنتخب الوطني المغربي اللي توعت فالماتش ديالو ضد إفريقيا الوسطى برسم الجولة الثالثة من إقصائيات كأس إفريقيا 2025، وما قدرش يشارك فالماتش الثاني برسم الجولة 4.

وخلال استقبال الهلال السعودي لياسين بونو، مساء اليوم الأربعاء بان النجم المغربي وهو ناشط مع صحابو فلاصال ديال الفريق فين كايترينيو، وكيضحك معهم، فالوقت اللي وضح فيه النادي السعودي أن الگول المغربي غايدير فحص بالأشعة على العضلة اللورانية ديال الفخذ فين توعت.

وكان ياسين بونو خرج فالشوط الأول من ماتش المغرب وأفريقيا الوسطى السبت اللي فات برسم الجولة الثالثة من إقصائيات كأس أفريقيا، وكمل الماتش بلاصتو الدوزيام گول منير المحمدي، ومن وراها عيط الناخب الوطني وليد الركراكي على المهدي مفتاح دارو بلاصة ياسين بونو فلاليست ديال ماتش البارح الثلاثاء ضد أفريقيا الوسطى برسم الجولة الرابعة.