كود سبور//

تعرض ياسين بونو لظلم حقيقي بالإبعاد ديالو من جائزة أحسن لاعب إفريقي لعام 2023، واختيار المصري محمد صلاح فاللائحة النهائية للمنافسة عليها، فاختيارات غير مفهومة من الاتحاد الإفريقي، علما أن لاليست فيها أيضا الدولي المغربي أشرف حكيمي اللي دار دومي فينال مع المغرب فالمونديال وربح بطولة فرنسا، والنيجيري فيكتور أوسيمين اللي ربح بطولة الطاليان مع نابولي.

وتصدمو المتتبعين لكرة القدم الإفريقية من إبعاد الاتحاد الإفريقي لكرة القدم الدولي المغربي ياسين بونو اللي تختار ضمن 13 أحسن لاعب فالعالم فجائزة الكورة الذهبية 2023، وثالث أحسن كول فالعالم فجائزة ياسين اللي بزاف من النقاد كيشىوفو أن بونو هو اللي خاصو يربحها، ووصل مع المنتخب المغربي إلى دومي فينال مونديال قطر، وربح اليوروبا ليك مع إشبيلية الإسباني.

والغريب فالأمر هو اختيار الدولي المصري محمد صلاح لاعب ليفربول النكليزي، اللي ما ربح حتى لقب مع الفريق ديالو وما لعبش كأس العالم مصر حيث أصلا المنتخب المصري فشل فالتأهل لمونديال قطر، وهذا الشي كيطرح مجموعة من علامات الاستفهام على الطريقة والمعايير اللي كيختار بهم الكاف اللوائح فالجوائز ديالو، وكيكذب كاع الإشاعات اللي كانت تتهم المغاربة بالتحكم فالاتحاد الإفريقي.

ودابا كلشي كيتسنا الجزائري رياض محرز يخرج يدوي ويدير شي حاجة، اللي كان سابق العرس بليلة، وخارج يتهم المغاربة بالتحكم فالاتحاد الأفريقي لكرة القدم، باش يعطي جائزة أحسن لاعب إفريقي لياسين بونو، وأنه هو (محرز) اللي كيستحقها اكثر من أي لاعب آخر، واخا داكشي اللي دار فالموسم الماضي ما كيوصلش للإنجازات اللي حقق ياسين بونو.