الوالي الزاز -گود- العيون ///
[email protected]

أكد الناخب الوطني محمد وهبي فالندوة الصحفية قبل ماتش غدا ضد البرازيل فإفتتاح ماتشات المجموعة الثالثة، أن التحضير النفسي مهم بزاف للاعبين وماشي غير فماتش البرازيل بل فكل الماتشات.

وأضاف وهبي أن اللعبين خاص يكونوا واجدين وتكون عندهم الثقة، وهادشي لا يعني أن المنتخب الوطني المغربي خايف من البرازيل، بل فقط كيحتارمهم، مضيفا أنه ما دار حتى شي حاجة خاصة باش يوجد اللاعبين، ولكن المنتخب عارف مبادئو وشكون كيمثل ومع من لاعب.

وتابع وهبي أن البرازيل معروفة وعندها كاليتي سواء فرديا أو جماعيا وعندهم مدرب واعر بحال أنشيلوتي، وكيستاحقو الإحترام، مضيفا أن بزاف كيقولو بأن البرازيل ديال دابا ماشي هي البرازيل ديال شحال هادي، ولكن راه كيستاحقو الإحترام وعندهم الرغبة باش يربحو كاس العالم.

وشدد محمد وهبي أن المنتخب البرازيلي ما خايفش من المنتخب الوطني، وحتى المنتخب الوطني ما خايفش منهم، وهوما كيحتارمو المغرب، والمغرب دابا عندو مكانة فالكرة العالمية، والعالم كيحتارمو وهادشي عاجبو وكيعجبو فاش الآخرين يحارمو منتخبنا الوطني.

وتابع وهبي أن الهدف دابا هو نوصلو لهدفنا باش يبقا العالم يحتارم المنتخب الوطني وخاص نديرو اللي فجهدنا باش نستافدو من هاد الإرث.

واكد وهبي، أنه لا يؤمن بالحظ، ولكن يؤمن فقط بالخدمة.

وعن طريقة لعب المنتخب فماتش غدا وخطة أربعة جوج ثلاثة واحد، قال وهبي أن منتخب البرازيل عندو فنيين كيحللو لعب المنتخب الوطني وطريقة اللعب، ولكن المنتخب عندو تظام وخطة لعب ماغيرة وماشي جامدة فخطة واحدة.

وأوضح الناخب الوطني ان البرازيل عندهم الكثير من نقاط القوة والجودة، وعندهم مدرب عندو جودة، ولكن حللنا أداء البرازيل وأنشيلوتي زاد ليهم بزاف فأدائهم.