گود سبور//

أكد الناخب الوطني محمد وهبي أن المنتخب الوطني المغربي كان غادي يلعب ضد الأرجنتين ماتش ودي فالتوقف الدولي المقبل، ولكن هما كانو باغيين يلعبو فالأرجنتين، ووضح أنه تم اختيار غانا حيث منتخب لعب كأس العالم 2026، وعندو إمكانيات مزيانة.

وهضر محمد وهبي خلال الإعلان على لاليست المنتخب المغربي التوقف الدولي المقبل، وقال: “كانت عندنا أولويات، وكان ممكن نلعبو مع الأرجنتين، وكان هذا طلب مني وغايكون مهم لنا، ولكن الأرجنتين كانو باغيين يلعبو فبلادهم والمفاوضات كانت صعيبة، والأمور معقدة باش تمشي من جنوب إفريقيا من ورا ماتش ليسوتو الأرجنتين”.

وبخصوص اختيار غانا وضح وهبي: “أما المنتخبات الأوروبية عندها ماتشات والأمور معقدة وكانت عندنا خيارات على المستوى الإفريقي، وبغينا منتخب اللي شارك فكاس العالم وغانا لعبو المونديال ودارو ماتشات مزيانين وعندهم مدرب مزيان وهذا خصم مناسب لنا”.

وغادي يلعب المنتخب الوطني المغربي ضد الگابون يوم 25 سبتمبر فالرباط، ضمن الجولة الأولى من إقصائيات كأس إفريقيا 2027، وغادي يمشي لجنوب إفريقيا باش يلعب ضد ليسوتو يوم 29 سبتمبر ضمن الجولة الثانية، ويرجع للمغرب يلعب ضد غانا يوم 4 أكتوبر.