كود الرباط//

قال وزير العدل عبد اللطيف وهبي، بلي عدد المتسولين (السعايا) كان وصل لـ200 ألف متسول ف 2007، وفق إحصاء رسمي كان دار.

وأفاد وهبي، خلال جوابه على أسئلة البرلمانيين في جلسة عمومية بمجلس النواب، اليوم الاثنين، بلي مؤخرا، وبالضبط ف عام 2020، كانت 6028 قضية تسول فالمحاكم، أدين فيها 6025 متسول متهم.

وأضاف وهبي: “التسول في مواقع التواصل الاجتماعي بحال بحال ف الواقع، الآن خرج قانون الإحسان العمومي وللي خرج عليه فراه جريمة”.

وتابع: “المشكلة ماشي فقط فالتسول على مواقع التواصل الاجتماعي، بل تتم عبر عملية النصب عن طريق شي واحد مريض. القانون الجنائي يؤكد واقعة غير صحيحة باش ياخد الفلوس”.

وزير العدل كيف عادتو، صيفط كلاشات سياسية لشي وحدين خصوصا للي عندهم قنوات اليوتيب وجمعيات تتدعي الدفاع عن حقوق الإنسان والمال، وقال: “يلا بقينا فالتسول فالفلوس ماشي مشكل دبا كاين كيتسول بالخطاب السياسي والحقوقي الله يجيب الخير وصافي”.