كود مراكش//

انطلقت اليوم الأربعاء 2 أبريل 2025 بمدينة مراكش أشغال الدورة الثانية من المؤتمر الدولي حول “قانون الشغل والتنوع”، من تنظيم وزارة العدل بشراكة مع نقابة المحامين الدولية (IBA)، وغادي يستمر حتى نهار الجمعة 4 أبريل، بفندق موفنبيك.

هاد المؤتمر جاب لمراكش وفود من أكثر من 58 دولة، فيهم محامين، خبراء قانون، ممثلي منظمات حقوقية ومكاتب محاماة عالمية، باش يناقشو كيفاش الرقمنة والذكاء الاصطناعي قلبو بيئة العمل، وشحال خاص قانون الشغل يواكب هاد التحولات.

وزير العدل عبد اللطيف وهبي ترأس الجلسة الافتتاحية، وكان حاضر حتى كاتب الدولة المكلف بالتشغيل هشام صبيري وعدد من الشخصيات القانونية الدولية. وهبي قال فالكلمة ديالو: “خاصنا نواكبو التحولات الرقمية ونقننو العمل عن بعد بقوانين جديدة كتحمي الحقوق وكتضمن التوازن”، وأكد أن المغرب خدام على تحديث الترسانة القانونية المرتبطة به، من الأمن السيبراني لحماية المعطيات الشخصية.

المؤتمر هضر على بزاف ديال المواضيع، من بينها: قانون الشغل فزمن الرقمنة، التحديات ديال العمل عن بعد، التنوع والاندماج داخل المقاولات، حماية المعطيات الشخصية، ومخاطر السيبير في بيئات العمل.

الدورة الحالية جاية تكملة لدورات سابقة فبوينس آيرس (2023) وميلانو (2024)، واللي كانت تطرقات لموضوعات بحال الصحة النفسية والذكاء الاصطناعي فالعالم المهني.

البرنامج مستمر لمدة 3 أيام، بجلسات وورشات غادي تخرج بتوصيات قانونية جديدة كتحاول تواكب التحولات السريعة اللي كيعرفها سوق الشغل.