گود سبور//

عبر الناخب الوطني محمد وهبي على الفرحة ديالو بمستوى المنتخب الوطني المغربي فالماتش الودي ضد الباراگواي اللي ربحوه بنتيجة 2-1، اليوم الثلاثاء فلانس ففرانس، ووضح أنه دار تغييرات باش يعطي فرصة لكاع اللاعبين وأكد انو الخدمة مازال تابعاهم باش يوجدو لكأس العالم 2026، الصيف الجاي.

وهضر محمد وهبي وقال فتصريح له بعد ماتش المغرب والباراكواي: “فرحانين، وكيفما قلت فالبداية حنا كانوجدو لكأس العالم، وفنفس الوقت باغيين نربحو الماتشات، وضروري نجمعو بين الاستعداد والنتائج، درنا تغييرات ولكن ما بغيناش نبدلو الفرقة كلها، حيث هاذ الشي مهم حتى هو، وملي كانبدلو بزاف ديال اللاعبين ما كايكونوش ديما فأحسن الأحوال باش يبينو شنو عندهم”.

وكمل وهبي وزاد وضح: “خلينا 4 او 3 ديال العناصر أساسيين باش نسهلو دمج اللاعبين الصغار، وكان مهم نحافظو على التوازن ونعطيو الفرصة لكلشي، وبغيت اللاعبين يخليو القرار ديالي صعيب بخصوص اختيار القائمة اللي غادي تشارك فكاس العالم، بتقديم مستوى مزيان والرباح”.

وبخصوص منتخب الباراگواي، قال وهبي: “لعبنا ضد خصم قوي، وكان متماسك اگريسيف، وما خلاوش لينا حلول بزاف، خصوصا فالشوط الأول، وحاولنا نوصلو للشبكة، ومن وراها صححنا شي حوايج بين الشوطين وبان التحسن على الفريق ومستواه فالشوط الثاني”.

وبالنسبة للي شونجمون، وضح وهبي: “بغيت نعطي دقايق د اللعب لشي لعابا، ويمكن طاح الريتم شويا، وهذا الشي عادي فليماتش أميكو من ورا الدقيقة 65، ودابا غادي نركزو على الحوايج الزوينين ونكملو الخدمة”.

وسالا وهبي وهو كايأكد: “غادي نبقاو متبعين اللاعبين عن قرب باش نضمنو جاهزيتهم لكاس العالم، وخاص يكون تتبع دقيق لهم، ومازال تابعانا خدمة كبيرة، وخاصنا نكون واجدين لهاد الشي”.