گود سبور//

كشف الناخب الوطني محمد وهبي، على كواليس اختيار يونس ابن طالب لاعب فرانكفورت، اللعب للمنتخب الألماني، واخا كان يقدر يعيط له للمنتخب الوطني المغربي.

ووضح محمد وهبي وقال: “يونس ابن طالب تابعناه من الموسم الماضي وكان فاللائحة الأولية لمعسكر المنتخب فشهر ماي الماضي، وتعرض لإصابات كثيرة وجا من مستوى أدنى ووصل لفرانكفورت فشهر يناير كان عندو بروفايل مهم وتابعناه ولكن ما كانش مؤهل يلعب كاس العالم وما كانظنش أنه كان الاختيار الأول ديال ألمانيا، وهذا الموسم كان موجد وبدا مزيان، وكان يستاهل يتعيط له للمنتخب”.

وكمل وهبي وأكد: “تلاقيت معه وكان ليا معه حوار وهضرنا على مشروع المنتخب المغربي وبلاما نواعدو بشي حاجة، ومن بعد منها اختار داكشي اللي بغا، ومن غير هذا الشي ما كان علينا نديرو حتى شي حاجة اخرى، واختيار المنتخب المغربي ما فيهش التفاوض ولكن فيه الاستحقاق، هو اختار ألمانيا كانتمناو له التوفيق وهذا الملف تطوى، حنا السادسين فالعالم، وباغيين نكونو حسن من هذا الشي”.