كود -كازا //

وزير العدل عبد اللطيف وهبي رجّع من جديد قضية سبتة ومليلية للواجهة، وأكد باللي المغرب ما تخلاش على المطالبة باسترجاع سبتة و مليلية، وقال أن هاد الملف باقي حاضر فالمباحثات مع إسبانيا.

وهبي قال بلي المغرب كيتعامل مع هاد القضية بـ«النَّفَس الطويل» وبالحوار، مع التشبث بموقفو وبالأراضي اللي كيعتبرها تابعة ليه، وأكد أن الحل خاصو يجي من القنوات الدبلوماسية.

وفتصريحاتو لقناة «الشرق بلومبرغ»، وضح وهبي أن الرباط كيطرح قضية سبتة ومليلية وسط الاجتماعات مع المسؤولين الإسبان، وأن الموقف المغربي ما تبدلش، هاد التصريحات جات فوسط نقاش جديد على العلاقات المغربية الإسبانية، خصوصاً مع ارتباط ملف بمواضيع الهجرة والقاصرين المغاربة فإسبانيا.

وبخصوص القاصرين المغاربة، شدد وهبي على أن المغرب باغي يسترجعهم، وقال: «ما غاديش نتنازلو على ولادنا»، واعتبر أنه ما يمكنش يتخلاو عليهم و يعيشو فبيئة بعيدة على القيم ديالهم ،وكشف أن الاتصالات على هاد الملف كاينة عامين.

وهبي انتقد حتى السياسة الأوروبية والإسبانية فمجال الهجرة، واعتبر أنه كاين تناقض بين مطالبة المغرب بمحاربة الهجرة غير النظامية، وبين تسوية وضعية بعض المهاجرين من بعد ما يوصلو لأوروبا، أو السماح ليهم يطلبو اللجوء.

وأكد أن المغرب مستعد يتعاون مع إسبانيا والاتحاد الأوروبي فملف الهجرة، ولكن ما غاديش يقبل يتحول لـ«جدارمي ديال أوروبا»، أو يتحمل بوحدو مسؤولية مشاكل مرتبطة بالحدود والديموغرافيا الأوروبية.