كود الرباط//
فجر عبد اللطيف وهبي، وزير العدل، فضيحة سياسية وقانونية اليوم الثلاثاء فالبرلمان، خلال مناقشة مشروع قانون المسطرة الجنائية، بعدما اتهم بشكل صريح رئيس جمعية لمحاربة الفساد (دون أن يسميه) بأنه استفاد من ’’فيلا” فطور الإنجاز، واعتبر هاد المعطى دليل على تناقض بعض الأصوات اللي كتدعي الدفاع عن المال العام وهي نفسها “كتلعب دور الملائكة”.
الوزير وهبي هاجم أيضا طريقة التعاطي مع شكايات الفساد ضد المنتخبين، وقال باللي بزاف منها كتحفظ، وفيهم اللي كيبقاو كيدورو فدوائر الأمن بلا مبرر، مشددا: “يهمني رئيس بلدية نزيه كيتكرفس وكيتمرمط، وماشي جمعوي كيدير ندوات وكيقلب على البطولة الأخلاقية في الإعلام”.
وهبي وجه رسالة مباشرة للجمعيات اللي كترفع دعاوى المال العام، باللي مشروع المسطرة الجديد ماشي موجه ضدها، لكن كيضبط العمل ديالها وكيبغي يحد من الخلط ما بين المبادئ الحقوقية والمزايدات السياسية.
وهبي، فجوابه على مداخلات الفرق البرلمانية، هضر على فضايح بيع الدبلومات بجامعة ابن زهر، للي بطلها الأستاذ قليش، بحيث قال بلي هاد الأستاذ كيترأس جمعية وقعت اتفاقية مع وزير عدل سابق، وهاد الأستاذ هو المتهم فملف المتاجرة بدبلومات الماستر بجامعة ابن زهر، واللي تفجّر مؤخرا وهز الرأي العام.
